BNO-英國護照

英國護照 點解可以發得咁混亂

有一宗膠事錄嘅膠聞,其實同香港人息息相關,只不過香港傳媒唔會報,就係蘇格蘭有五名英國公民,發現自己收到根本係另一個人嘅護照,五個人嘅護照情況有如撈亂骨頭。其實由利物浦中央處理大部分 英國護照 申請後,情況反而無改變。呢個可以理解,因為英國國籍法根本太複雜,咁玩落去,遲早玩到hang機收場。

英國護照 種類太多

全世界應該得英國,至將公民分成六個等級,正式將呢啲等級具體實現,係令香港人受害嘅British Nationality Act 1981,1981年英國國籍法,果陣已經有電腦,啲人以為有咗電腦系統,就唔會發錯,千秋萬世都可以用埋啲咁複雜嘅國籍同入境制度。但世事唔係咁理想,依家嘅電腦系統處理能力,無錯係勁好多,但唔代表啲資料唔會錯,有電腦,一樣可以錯,而且英國本來無歐陸式嘅戶籍制度,而BNO嘅database本來係獨立,依家又合埋一齊,結果咪炒晒粉。依家仲要嚟個Windrush危機,內政部要抽調人手處理,就亂上加亂,遲啲加埋BREXIT,EU Citizen有啲要subject to immigration control,有啲唔駛,就更亂,屆時每個月換一個內政大臣,都唔會解決到問題,因為你要維持一個複雜到極點嘅國籍法,係要好高成本,英國嘅公帑同國家安全,以至行政效率,值唔值得為一個亂七八糟嘅系統而犧牲。由IA 1971開始就留喺度嘅Windrush Generation,果啲人應該喺BNA 1981就變英國公民,都可以錯到依家有一堆人被錯誤deport,大家仲可以諗到成個系統有幾亂葬崗?德國人一向大家以為佢地嚴謹,都可以啲文件寫錯名(好閒,經常發生),我完全諗唔到英國依家發生緊乜事。

所以我對BNO平權係好有信心,啲華人成日諗係「種族歧視」,但英國人諗係,依家Home Office已經變成失控嘅癌腫瘤,呢個系統玩到BREXIT如果真係發生,就大家買定大量花生等睇戲都得,沒有最膠,只有更膠。當然,平咗權英國仲有其他著數,但令Home Office改革可以成事,應該係一個重大誘因,因為一個咁亂、膠而複雜嘅系統,根本唔會阻到非法移民,只會日日製造膠聞。

發表迴響

你的電子郵件位址並不會被公開。 必要欄位標記為 *