梁天琦-安華-min

由安華到 梁天琦

法院喺陪審團被威嚇嘅情況下,仍然對 梁天琦 暴動案指控作出裁決,呢個一定唔係一個公正嘅判決。但 梁天琦 離開法院果陣嘅眼神同神情,我諗起係安華,同埋南洋嘅烈火莫熄(Reformasi)運動,一個本來反對馬哈迪嘅運動,後來最後甚至馬哈迪自己領埋軍,結束咗國陣六十一年嘅統治。 梁天琦 離開法院嘅一幕,或者話俾大家聽,如果香港有烈火莫熄運動,一定係同 梁天琦 有重大關係。將 梁天琦 送入監獄,同送安華入監獄係同一級別嘅愚蠢。

梁天琦 到香港嘅烈火莫熄

烈火莫熄運動,係印尼文同馬來文 Reformasi嘅音譯,嚟自荷蘭文嘅reformasie一字(印尼好多字詞同荷蘭文有關連),本來係印尼推翻蘇哈圖腐敗統治嘅口號,喺安華入獄後,成為馬來西亞反對運動嘅主軸,由1998年馬哈迪炒安華魷魚開始,到2018年馬哈迪領導反對黨結束國陣嘅混帳統治,馬哈迪向君主要求特赦安華,並且獲批,整整二十年。而中文嘅譯法烈火莫熄,恰好將呢場二十年對一個不公義制度嘅鬥爭,有一個好浪漫嘅描述,亦好合符印尼-馬來語系嘅文化,因為改革猶如一場火。

梁天琦 入獄,我會講係香港烈火莫熄嘅開始,戴耀廷教授有樣嘢無搞清楚,無烈火莫熄,係唔會有希望聯盟,以及背後嘅兩線制論述。對住一個貪婪嘅不公義體制,要不斷維持住一團火,直至人民獲得解放,呢個就係烈火莫熄嘅意義。印尼就係喺尤多約諾將軍上台,場火熄咗,改革不繼,結果依家有可能向混帳政治走回頭路。所以大家要有心理準備,呢一場鬥爭,可能係一場長達廿幾年,甚至三十幾年嘅鬥爭,而將中共或中國喺香港統治鬥倒後,係仍然要對不義體制鬥爭。正如當初安華嘅敵人係馬哈迪,但點解馬哈迪最後係成個抗爭嘅領導者,因為連佢做過首相,都感受到不義體制果種輾壓,佢不得不出嚟收拾殘局,大家睇到納吉兩公婆搜到啲現金多到要用紙箱裝,而Hermès手裝多到可以設立博物館,就知道件事可以幾黐線。如果有朝一日梁振英被捕,我懷疑情景會係幾壯觀嘅一回事。

香港人應該為自己嘅烈火莫熄運動諗一條路,唔好令 梁天琦 白坐。真係會坐穿牢底果個,係 梁天琦 ,唔係果啲自己選舉輸咗後仲鬧人嘅左膠,或長期喺國民黨扮激進嘅老而不。

發表迴響

你的電子郵件位址並不會被公開。 必要欄位標記為 *