地厚天高-梁天琦

由千言萬語到年少無知到 地厚天高

有可能今日就有梁天琦暴動罪嘅判決,對我呢個歐洲人,法院點判,我都認為梁天琦無罪,又唔係1967年中共搞嘅恐怖主義,魚蛋革命喺歐洲標準簡直係小事,法國同德國果啲我唔知叫乜嘞。正如安華被人判肛交罪成,但馬來西亞人民用投票否定混帳嘅法院同法律,安華光榮出獄,跟住納吉準備入獄。或者梁天琦出嚟果日,梁振英準備入去。我反而想講, 地厚天高 同梁天琦拉上關係嘅原曲:Beyond 《十八》

千言萬語到 地厚天高

其實 地厚天高 都係嚟自當中未解散嘅Beyond,黃貫中寫嘅《十八》,呢首歌由一個經歷過咁多事嘅梁天琦喺《地厚天高》片尾去唱,佢自己經歷咁多去唱一首咁冷門嘅歌(呢首唔係主打,Good Time 係 Beyond 解散前最後一張專輯),唔係因一套TVB神劇年紀未到,閱歷未夠就跟住唱《年少無知》(《年少無知》係我呢啲四張嘢都係勉強可以唱果種,但攞嚟做小說標題唔錯)。其實可以係一個對依家香港政壇赤子太少,人渣太多嘅世界嘅總結。

從不知天高與地厚 漸學會很多困憂
也試過制度和自由
也許不再沒有 又或者不想再追究
我發覺這地球原來很大 但靈魂已經敗壞

呢四句比《千言萬語》謝君豪嘅角色,更能總結依家發生乜事。靈魂敗壞,係香港泛民嘅問題,而且問題比《千言萬語》果陣嚴重,許鞍華嘅《千言萬語》已經提出呢個問題,但泛民中人有幾多認為思考《千言萬語》提出嘅問題,《年少無知》同埋《天與地》對林保怡演嘅角色嘅塑造(果個根本係按劉江華腐敗嘅經歷寫出嚟),係再一次提出問題,但唱《年少無知》嘅人有幾多知道首歌講乜先得。最後,梁天琦提供咗一個答案,《地厚天高》係回應《千言萬語》以至《年少無知》嘅答案。

馬來西亞變天成功,不只因為馬哈迪好嘢,或者乜嘢希望聯盟,其實最終係司徒華果句:成功不必在我,成功必然有我。由林吉祥到安華到馬哈迪自己都放低自己嘅私心,共同為馬來西亞做一件事,所以成功咗。問題,做到呢樣嘢前提係靈魂不可敗壞,只不過依家泛民呢班友,真係吾不欲觀之。

但可以肯定係, Beyond 幾時係香港政治民謠嘅誦唱者,由《海闊天空》、《天與地》、《十八》、《年少無知》,邊首同Beyond無關?否定Beyond嘅友仔(特別熱普城班友),我諗太多都係唔照鏡。(雖然亂咁唱果啲,都係唔照鏡。)

One thought on “由千言萬語到年少無知到 地厚天高

發表迴響

你的電子郵件位址並不會被公開。 必要欄位標記為 *