馬來西亞變天-新加坡-min

馬來西亞變天 正影響新加坡

新加坡國會喺 馬來西亞變天 後出現一幕以往唔會出現嘅奇景,喺反對派換領袖換人果陣,政府部長出面喺演辭上致謝。相信大家都唔會估到, 馬來西亞變天 會促使新加坡國會出現人民行動黨向工人黨秘書長致謝嘅演說。但呢個,正反映人民行動黨嘅危機感。

馬來西亞變天 世界變得唔一樣

馬來西亞變天 呢樣嘢,係出乎人民行動黨4G領導人嘅接班安排之外,因為無人估到馬哈迪醫生可以組成復仇者聯盟,將馬來西亞政壇嘅狗屎垃圾掃清光,幾乎可以肯定,傳統希望聯盟唔敢做,唔想做果啲污糟嘢,馬哈迪醫生會好似做手術咁做鬼晒佢,因為佢都九十二歲,唔爭在。而馬哈迪醫生係李光耀差唔多級數嘅異形嚟,加上依家希望聯盟嘅友仔戰鬥經驗豐富,同樣係傳落下一代,脫胎自人民行動黨嘅民主行動黨候任財相林冠英,連坐監經驗都有,呢個人戰鬥力有幾高,大家諗吓,馬來西亞喺呢啲強人下完成民主化,新加坡將會面臨幾大嘅挑戰同威脅。過往新加坡相對開明,同西化,就話佔盡優勢,但如果馬來西亞向李光耀定立嘅馬來西亞人嘅馬來西亞嘅路邁進,以新加坡嘅size以至政治環境,就會變得十分之問題多多,呢件事對人民行動黨就好頭痕。

所以新加坡人民行動黨依家面對一場巨變,如果馬來西亞真係最終變成馬來西亞人的馬來西亞,仲要言論環境等各方面開明嘅話,馬來西亞有石油、有人才、有一鼓建立新國家嘅幹勁,人民行動黨如何回應呢個時代就好重要,畢竟新加坡立國,係同馬來西亞人的馬來西亞有關。如果有朝一日,新馬重新合邦,咁人民行動黨有無呢個戰鬥力,喺馬來西亞呢個猛人如雲嘅年代佔一席位,如果唔合邦,咁點樣保證新加坡嘅地位,唔會被吉隆坡或者檳城搶咗,呢啲問題,都係李顯龍不得不思考。而如果要再合邦,或者要「提升戰鬥力」,經過艱苦戰鬥而贏得阿裕尼集選區仲守得住嘅工人黨,就變咗人民行動黨需要考慮嘅合作對象,畢竟時勢大大唔同。

香港仲玩緊亂咁DQ人,濫用法律呢啲白痴過時遊戲果陣,南洋已經思考緊新方向。相信南洋真正最大問題,係反恐,呢個問題反而堅係要解決。我稍後會分析我家鄉嘅恐襲。

One thought on “馬來西亞變天 正影響新加坡

  1. 但其實希望聯盟本身好鬆散,最大公因數幾乎就係「推翻納吉同國陣」。馬哈迪本身土著團結黨對巫人一樣要開期票,要兌現起黎同民主行動黨實有衝突。馬來西亞應該有一段日子都未能真正擺脫種族政治。

發表迴響

你的電子郵件位址並不會被公開。 必要欄位標記為 *