馬來西亞大選-min

星期日休息: 馬來西亞大選 睇香港傳媒質素

馬來西亞大選 突然搞出變天結果,香港傳媒啲勝利球迷突然變晒馬來西亞專家。雖然我係南洋人,但我都不得不承認,南洋政治不單冷門,而且係專科嚟,因為南洋政治背景亂七八糟嘅背景,係大家估佢唔到。只不過,香港傳媒啲友仔慣咗唔知醜,喺馬來西亞呢個政治複雜到爆嘅地方做勝利球迷就一定會出事。呢次,我就係要剖析, 馬來西亞 大選點樣反映啲友仔醜態百出,不知所謂。

馬來西亞大選 評論問題一:無基本知識亂咁嚟

首先,你要做任何新聞報導,記者一定要掌握基本知識,無基本知識亂舞一通係會出事,而憑自己嘅偏見去估完又估,寫武俠小說咁寫,就更加之會出事有突。而《蘋果日報》亂估君主推遲馬哈迪醫生宣誓,以及鳯凰衛視記者,亂問林冠英嘅「中國人」財相身份,正係例子。

先講《蘋果日報》,點解我話係亂寫武俠小說,英國由於無成文憲法,英國君主委任國會最大黨領袖為相係憲政慣例,所以基本上女皇可以知道選舉結果,召見黨派領袖後隨即指派為相。但馬來西亞唔係,馬來西亞係有成文憲法,根據聯邦憲法,第43條2(a)款,係咁寫:

the yang di-pertuan Agong shall first appoint as perdana Menteri (prime Minister) to preside over the Cabinet a member of the house of Representatives who in his judgment is likely to command the confidence of the majority of the members of that house;

咁國會會都未開,君主憑乜去斷定馬哈迪係憲法果個人,所以就要國會議員立即畫龜,大家要留意,馬來西亞有「青蛙議員」有種仆街,勢色唔對或收咗錢就跳黨呢啲仆街嘢依家都周不時發生,依家砂拉越、沙巴、霹靂都出現呢啲膠事,你話我係君主,係唔會要睇晒畫龜嘅文件,再見晒啲希聯領袖,之後再作委任,一日搞掂已經係十分之快。所以,我鬧爆《蘋果日報》喺呢次處理係咁解,總編輯喺呢方面,係失職。

跟住鳳凰衛視,其實南洋華人唔可以當中國人,呢個係中國過往爭取南洋國家支持果陣,喺建交公報寫上去嘅共識,所以乜嘢人有中國血統都可以屈有中國國籍,南洋果啲一定唔得,呢個係一個關乎會唔會死人嘅問題,但有人係基本功課都唔做就亂問,結果咪出事。呢啲係南洋政治ABC,無理由錯成咁。林冠英如果轉數唔夠,就真係被人累死都唔知。

至於果件李聲揚,我就更加之好心呢啲財演,出少句聲,如果你唔知點解林冠英咁大反應係有背景,就唔好亂咁寸膠總,如果識問題,係會用ethnic Chinese嚟問,用Chinese,喺南洋,指係指中國人,李聲揚唔係南洋人,唔該收聲。雖然,我一直都認為,呢啲財演一直應該被嚴格監管,由佢地呢啲小事嘅態度就明。如果佢敢評論南洋有關股票,我實睇到實一實。

即食麵專家

我唔喺香港,所以我唔出嚟傳媒評論都係正常,畢竟我人喺德國,仲要我其實呢幾日喺柏林公幹,我真係唔係太得閒。只不過,唔代表要搵啲即食麵專家,好似now搵郭一鳴評,我真係想講一句,關佢叉事,我諗佢識鬼南洋政治。跟住蘋果日報嘅安裕,忽然講乜嘢「基辛格」的學生,我唔知當中有乜關係,基辛格眼中獨到,佢喺八十年代已經中咗一次,馬哈迪唔係新人。但基辛格係猶太,到今日大馬護照持有人去以色列,都唔會喺passport度stamp嘅,以色列飛機唔可以使用大馬領空,你話馬哈迪係猶太人學生?呢啲不單無貨交,仲要隨時引發大風波,我真係唔知寫嚟為咗乜?

香港傳媒太習慣搵啲平日無做功課嘅即食麵專家,呢個係十分之大嘅問題,其實國際事務係無萬能專家,例如南美同非洲問題,唔好搵我,我唔識嘅,歐盟咁大,東歐果啲問題,我好多都會寧願唔寫,因為唔熟書。係應該按課題搵專家,唔係搵容易搵到嘅瑞士軍刀專家,搵瑞士軍刀嘅結果,就係一去到英美英語區以外嘅課題,全部死火收場。但世界,往往唔係只得,英語系國家,更加唔係只得英美,南洋就係一個同香港關係密切,但啲人往往唔願意去落苦功嘅課題。

發表迴響

你的電子郵件位址並不會被公開。 必要欄位標記為 *