電梯-min

恐怖中國製 電梯 :仲有排你驚

中國成日出現嘅恐怖無喇喇跌落𨋢槽嘅 電梯 意外,終於喺香港出現,由中國製嘅廣日 電梯 ,喺上水名都巴黎閣發生恐怖意外,因為 電梯 車廂同外門唔係同時開關,結果有一名乘客被扯上去,再跌落𨋢槽,呢類中國式意外,終於出現。

電梯 恐怖問題有排你驚

呢次出事嘅廣日電梯,廿年𨋢齡係唔係老,唔係,德國我住緊果度部𨋢簡直係《花樣年華》年代果個style,真係可以著到梁朝偉、張曼玉咁去影相都仲得,但點解德國就算唔係原廠保養,由小公司保養都無事,但香港會出事成咁,因為香港無類似TUV 之類獨立組織,去做每年嘅 電梯 檢查工作,呢樣嘢,我喺上個月香港東洋牌 電梯 意外果陣講過,依家話口未完,一個月已經出單咁恐怖嘅意外,我相信如果香港監管制度唔改,呢啲意外有排你受,真係食驚風散都唔夠,我十分之懷疑,香港人要買人壽保險嘅原因,唔係為咗投資,而係香港一早已經係周圍係炸彈,依家香港同Final Destination嘅世界有乜分別?我真係睇唔到當中嘅分別。

跟住係中國製造 電梯 問題,華懋樓大家都知用料比較差,所以果陣華懋已經夠薑用中國製嘅 電梯 ,呢啲 電梯 加上果啲小外判商嘅二流維修,結果依家係咪搞出一鑊泡出嚟。而大家諗吓,1997年後嘅香港,好多 電梯 都係中國製,甚至大廠如KONE、Schindler都有中國製產品果陣,可能本身製造果陣,已經係設計或手工上無咁好,或有啲偷工減料問題,跟住保養俾啲細公司做,又無好嘅監管制度確保 電梯 妥為保養,結果咪座座大廈都有嘅 電梯 變咗死亡陷阱,你話日日壞𨋢都算,如果成日有啲咁恐怖嘅意外,你估啲香港人會唔會嚇到日日行樓梯。(雖然香港啲後樓梯,通風奇差,根本都唔適合你行,當夏天熱到黐線果陣,你試吓行俾我睇)。

所以,呢啲恐怖 電梯 問題,甚至因此而嚟嘅死亡數字,只會越嚟越多,而唔會減少,大家睇中國有咁多呢類型意外,都知道中國政府根本無呢個魄力去解決問題,香港呢個官商勾結政府,都唔會有呢個魄力去解決問題,遲早香港人搭個𨋢都要拜神同祈禱。

2 thoughts on “恐怖中國製 電梯 :仲有排你驚

發表迴響

你的電子郵件位址並不會被公開。 必要欄位標記為 *