安華-min

安華 獲全面赦免:馬哈迪好快可以退落嚟

馬哈迪雖然92歲,但佢上台後效率係快到你唔信,佢今日同國家元首講赦免 安華 ,跟住國家元首已經同民主行動黨秘書長林冠英講, 安華 可以赦免,諭令希盟做嘢,馬哈迪應該好快完成歷史任務,將相位俾真嘅首相 安華 擔任。

安華 好快可以出嚟改革大馬

馬哈迪雖然頭腦清醒,但佢作為醫生,佢自己知道92歲做首相隨時死於任內,所以佢一早同王室講赦免 安華 好合理,畢竟佢呢次出戰本來係避免大馬陷入南斯拉夫式解體而戰。但馬哈迪係唔只做赦免 安華 呢件事咁簡單,王室係故意放風俾民主行動黨秘書長林冠英,呢個係營造民主行動黨係同馬來王室關係良好嘅形象,有可能係為林冠英接任財長鋪路。而華人擔任財長呢個係有馬來西亞憲政先例,馬來西亞獨立後首任財長李孝式爵士,就係香港出世,皇仁書院同劍橋大學畢業嘅華人。而林冠英接任財長,呢點對由納吉搞出嚟嘅財政大頭佛,係十分之重要。林冠英本身係會計師出身,而佢重整檳城嘅財政有共目睹,華巫印三族都對林冠英心服口服,相信檳城州依家未公布首席大臣,都係因為林冠英可能上調聯邦嘅緣故。

點解要全面赦免 安華 ,因為要安華參選下議院,以下議員身份擔任首相,委任佢做上議員做首相係唔啱規矩,應該希盟準備一個safe seat佢快速辭職,嚟個快速補選,咁就搞掂,而 安華 嘅原選區,檳城州嘅峇東埔選區,係由 安華 個女守住,所以呢個唔係大問題,相信由王室赦免,到安華可以宣誓做首相,應該係三個月到半年嘅事,而且 安華 本身已經有內閣經驗,所以一切無乜大難度,但肯定要時間走晒啲程序,始終馬來西亞都係要重上法治嘅軌道。

喺呢度,我真係要警告啲香港傳媒,唔好唔識亂寫廿四,我唔知中國仲有乜政治議題,但亂咁挑撥馬來西亞政壇啲關係,特別王室同政界嘅關係,馬來西亞係唔俾呢啲香港垃圾記者入境都仲得,因為呢啲議題極為敏感,搞得唔好係會搞出騷亂出嚟,唔好講笑。要寫南洋嘢,唔該問番啲南洋出身嘅人嘅意見,唔好抄新華社,如果係收中聯辦柯打,就更加之抵打,南洋嘅事唔關你班西環仆街嘅事。中國唔好亂咁干涉他國內政。

One thought on “安華 獲全面赦免:馬哈迪好快可以退落嚟

發表迴響

你的電子郵件位址並不會被公開。 必要欄位標記為 *