法定語言-min

廣東話係唔係 法定語言

廣東話係唔係母語,係唔係語言,呢個近日因土共蠢到加零一掀起討論。Ben Sir 歐陽偉豪,故意用廣東話寫入合約,亦即香港語,咁得唔得?如果根據《法定語文條例》,除非有人要煽動港獨,將廣東話踢出中文定義,否則無人夠薑唔承認用廣東話寫嘅合約。

法定語言 定義好鬆

其實《釋義及通則條例》,以及《法定語文條例》對何謂 法定語文 定得好鬆,就係中文同英文,無特別定義乜叫中文,所以呢個無明文嘅表述,俾啲大中華膠好廣泛嘅空間,如果無人要蠢到學佛朗哥或者蔣介石,其實只要係「中文」呢個框架下,用福建話、廣東話、四川話,甚至文言文入合約到,都無人理你。而法庭喺刑事案嘅口供,更加要信納,否則香港政府點會要整HKSCS字集。所以,如果中國人唔係蠢到要搞真港獨,暫時我睇唔到香港語會踢出 法定語文 嘅原因。但如果有土共要法院清楚定義乜嘢叫中文,咁就一定出硬大事,香港唔獨立就勢係假,而港獨支持者,會多謝呢班XX提供寶貴彈藥。

同樣,依家喺新加坡最高法院,如果你要用廣東話宣誓都可以,因為廣東話視為中文一個sub-set處理。喺新加坡,你用閩南話宣誓都無問題,因為佢係其中一個官方語言嘅一部分。正如Singlish喺法院接唔接受?接受,道理一樣。所以廣東話,實際係香港、澳門、新加坡實際操作嘅 法定語文 ,呢點係無庸置疑,理論上,中華民國政府如果都係用類近處理地方語言嘅政策,既然可以用台語、客語喺國會發言,其實廣東話都得,不過,可能要等現任台灣駐德大使謝志偉教授做立委至有可能睇佢表演,因為現時台灣政府高層,暫時嚟講廣東話最流利就係謝志偉教授。

其實教育局呢次挑起語言爭論,好明顯係張曉明、蔡若蓮兩條友玩過咗龍,搞咗真港獨出嚟都唔知,如果真係講要對反對國家分裂立法,要拉都拉咗呢兩個煽動港獨嘅友仔先,如果中國唔想喺香港嘅統治再有進一步麻煩, 法定語文 同廣東話嘅定義,唔郁好過郁,郁語言呢家嘢嘅後果,不嬲都好嚴重,而且唔搞到血流成河,就已經係偷笑。

發表迴響

你的電子郵件位址並不會被公開。 必要欄位標記為 *