Jeremy Clarkson-min

百萬富翁 由 Jeremy Clarkson 主持 :好玩

百萬富翁呢個format,香港人唔陌生,雖然全球各地嘅Who Wants To Be A Millionaire嘅主持款都差唔多,我睇過德國版同奧地利版,都係類近陳志雲或陳啟泰果個style。只不過,ITV搵咗 Jeremy Clarkson 嚟主持,成件事就好唔同。

Jeremy Clarkson 賣口臭

Jeremy Clarkson 係一個非典型遊戲節目主持,喺歐洲,所謂Quiz show主持基本條件,外型要睇落博學、穩重,但最好可以俾參賽者一啲心理壓力,所以喺德國ARD或ZDF嘅Quiz show,主持嘅型格係接近新聞主播,亦都係呢個原因。(ZDF嘅The Quiz Champion,癲到搵現任ARD Tagesschau嘅主播上去做expert同參賽者對戰添,但The Quiz Champion唔係人玩,日後有機會我介紹呢個最難挑戰嘅遊戲節目)。但 Jeremy Clarkson,你唔會諗到佢同博學或者穩重有任何可能嘅關係喇。

Jeremy Clarkson 咁賣乜?賣毒舌,簡單嚟講,賣口臭。你諗吓,佢以往喺Top Gear賣乜,除咗車輛知識,就係抽水,抽完又抽,典型嘅抽水車show。你諗吓百萬富翁嘅參賽者,上到電視當眾被 Jeremy Clarkson 抽水係乜嘢一回事,真係隨時明明識答嘅問題,都變咗唔識答,呢個係ITV將百萬富翁活化最關鍵一著,希望 Jeremy Clarkson 嘅非典型主持方式,加上佢想向BBC報復嘅鬥心,令呢個老氣橫秋嘅節目注入新活力,可以進入一個新嘅黃金時代。

香港人嘅眼界,只限於百萬富翁,其實喺歐陸,Quiz Show已經玩到好盡,由觀眾即時喺App一齊玩分獎金(德國就係),到超勁參賽者同五個唔同方面專家以一對五,對唔同國家嘅對抗賽,題目亦都千變萬化,你諗到嘅都超過晒,所以德國RTL買咗德國版做,奧地利ORF買咗奧地利版做,同德語區果啲喪到爆嘅遊戲節目都無得打。依家 Jeremy Clarkson 睇吓佢可以俾啲乜新嘢大家睇。

發表迴響

你的電子郵件位址並不會被公開。 必要欄位標記為 *