許智峯-min

許智峯 案:咁都告得四條罪?

許智峯 被警方拘捕,落案告佢刑毀、不誠實使用電腦、普通襲擊,以及妨礙公職人員執行職務。我覺得都幾好笑,為咗老屈,為咗俾立法會有藉口DQ讓席位俾陳家珮條仆街,乜都做得出。但我作為一個刑毀、不誠實使用電腦、普通襲擊三項罪受害者,我覺得政府無乜理由要處理 許智峯 案。拉咗都唔會搞到DQ到。

許智峯 案?搞掂啲大媽先

大家都記得我喺IFC阻止中國大媽喺Starbucks食用外來食品,被人打爛電話單嘢,結果果位中國大媽要賠錢,兼且守行為一年。我果次成部iPhone爛晒,都係賠咗四千銀俾我咁大把,而且果位大媽都係守行為,我想問撕壞「點名紙」,有幾大罪咁?我真係十分之想知,如果 許智峯 最後搞到要坐,點解果位大媽唔駛坐,唔通中國人喺香港特別惡?

跟住不誠實使用電腦,果次果個大媽強搶我手機,然後想毀滅資料,咁係唔係不誠實使用電腦, 許智峯 案咁都告得不誠實使用電腦,咁喇,果啲搶人手機嘅中國大媽又要告乜?仲有,好似蔣麗芸議員,都有做過類似行為,咁不如許蔣議員一併告埋,一併DQ埋,以示公允,唔好一個又告,一個又唔告至得,呢個世界梗係要公平啲㗎。

好喇,普通襲擊,一般大家都知其實好多時守吓行為,或者罰吓錢,應該係保證政府成功檢控,以免政府太無面。好喇,妨礙公職人員,我想問啲EO喺立法會執行緊乜職務,《立法會(權力及特權)條例》無賦予呢啲EO喺立法會任何權力,相反,呢件EO,我之前都講過,佢好大機會違反《立法會(權力及特權)條例》騷擾立法會議員嘅罪行,點解可以惡人先告狀成咁。

我覺得依家呢個政府,其實向緊大宋帝國嘅名相秦檜學習,秦檜最仆街果件事,唔係佢為咗保住高宗皇帝權力殺咗岳飛呢個國家英雄咁簡單,而係佢發明「莫須有」呢條罪,誅除異已連理由都費時俾,簡直開晒極權惡棍政權嘅所有先例,依家律政司嘅做法,不如話秦檜咁玩,要DQ 許智峯 根本係莫須有罪名,呢個香港真係黐線到一個無可想像嘅程度,我覺得 許智峯 可以向英國或其他國家尋求政治庇護,根本係赤裸裸政治迫害。

發表迴響

你的電子郵件位址並不會被公開。 必要欄位標記為 *