邱騰華-香港獨立-min

邱騰華幾時宣布 香港獨立 ?

喺貿易戰中,香港都受到影響,其實好正常,中國借香港個朵做幾多招徭撞騙嘅事,阿水都知,只不過香港商務及經濟發展局局長 邱騰華 打算同美國交涉,話香港係獨立於中國,要求置身事外。佢其實與宣布 香港獨立 無異,我覺得不如中國政府俾香港政府乾脆宣布 香港獨立 ,可能對中國仲有好處。

邱騰華嘅 香港獨立 行動同東南互保

邱騰華呢次形同宣布 香港獨立 嘅行動,真係激過香港果啲用嘴炮搞港獨友仔多多聲,中聯辦應該搵人嚴斥邱騰華,但如果讀通大清帝國歷史,其實呢次係義和拳亂果陣,大清帝國東南諸省《東南保護約款》嘅翻版嚟,當時盛宣懷、李鴻章、張之洞等人知道,跟慈禧太后條友癲落去,大清帝國東南各省必遭入侵,咁搞唔掂,所以不單抗拒當時以光緒皇帝名義落嘅宣戰聖旨,更加私自同西方國家領事約定,總之佢地控制嘅省份唔會陪北京班友癲,西方列強亦唔好無喇喇打入嚟,呢次《東南保護約款》玩抗旨,當然係無後果收場,仲要事後被朝廷讚,開啟咗中華民國建立初期期間軍閥割據局面。

我唔信邱騰華夠膽未問過北京,咁玩現代版本嘅東南互保,但有可能香港商界見勢色唔對,要求政府自己據理力爭,而北京亦唔敢出聲,一如當年慈禧太后都唔敢追究李鴻章等人嘅行為一樣,因為呢個可能係國家最後活路。其實有東南互保同韓戰嘅歷史在前,我完全唔明點解,中國人要咁抗拒 香港獨立 ,如果 香港獨立 可以確保中國同西方之間有一道窗口,點解唔支持 香港獨立 ,雖然我認為最有利係香港歸英,因為呢個係最可能得到美國信任嘅方法,其實呢個亦係對中國嚟講最有利嘅方案嚟,如果依家香港仲係英國第二大城市,馬克龍同默克爾兩個訪美已經擺平咗好多問題,駛鬼邱騰華自己去據理力爭咩,大家話係唔係?

由大戰略角度,港中分家係最有利,甚至中國可以從中攞到唔少利益,一如馬來西亞其實喺Singapore is out決定中得益,最後新馬都雙贏,中國人應該諗清楚Hong Kong is out可能係對中國最有利嘅決定,而且只要將界限街以北土地交俾香港人公投便可。依家最大問題係,中國政治上太多蠢人。

One thought on “邱騰華幾時宣布 香港獨立 ?

  1. 中共主動將香港擲畀英國佬,用「外判管理」名義畀多五十年定一百年你都得,畀香港人公投反而唔得。因為共產黨從來唔想見到真正民意,「自決」一定唔得,萬一到時佢想放手但你自決留喺中國咪弊﹖:P

發表迴響

你的電子郵件位址並不會被公開。 必要欄位標記為 *