Trump

Trump 嘅以戰迫和

昨日講過金正恩嘅以戰迫和,其實 Trump 都係用緊以戰迫和嘅招數,兩個以戰迫和嘅人將戰爭張力去到最盡,反而最後得出金正恩求和嘅結果,呢樣嘢,係以往喺研究戰略,或現實政治果陣好少留意到嘅課題,呢個係一個新課題。

Trump 式以戰迫和:打牌咁打

金正恩嘅以戰迫和,係山本五十六果隻,明知自己資源唔夠,擺明賭一鋪以短暫戰術勝利去求和,當年山本五十六做唔到嘅事,金正恩做到,當然呢啲係賭博嚟,好睇對家係乜人,同埋自己嘅牌風。而同二次大戰太平洋戰場唔同係,山本五十六唔可以對賭注作最終決定,因為最終決定權喺東條英機,而美國當時並無一開始就講明會打嘅態度,甚至當時有傳美國任由日本班賭徒偷襲珍珠港,換取國民支持名正言順參戰。但呢次唔同,金正恩做埋東條英機果份,佢可以當機立斷決定賭唔賭落去,而特朗普同羅斯福好唔同, Trump 空襲敘利亞,二話不說就送一堆戰斧導彈過去,嚇到普京根本唔敢應機,普京嘅二仔底底牌露晒出嚟。所以 Trump 只要憑嘴炮,話佢個掣大啲同work就搞掂,聽落好小學雞,但 Trump 嘅戰鬥意志係好強,而且係有實證係堅,所以金正恩好快得到佢要嘅嘢,並且表示收手。果次平昌冬奧,帶嚟咗一個類近乒乓外交嘅平台,北韓可以繞過中國直通信息俾南韓同 Trump , Trump 亦係一個識見好就收嘅人,佢知道佢賭啱咗,就隨時安排兩韓峰會收割成果。

Trump 有樣嘢係好,就係左膠長期都係嘴炮主義,本身成日靠把口凶人,但亦好容易被人大到,所以奧巴馬當政期間,令中國、俄國呢啲惡棍迅速增強力量,以為佢地可以為欲為,而 Trump 唔係,大家知道佢可以打,佢會堅打,睇過幾次佢嘅果斷演出,好似金正恩咪識玩,好似習近平呢啲唔識玩,就被人玩到收檔,而普京係長期不可一世,以為自己係彼得大帝第二,結果玩兩嘢自己都收埋檔,所以 Trump 嘅以戰迫和,反而係世界和平嘅保證,因為佢真係一個保證互相毀滅嘅人,玩政治嘅人,除咗希特拉呢件魔鬼,有幾多個真係想追求毀滅?

One thought on “Trump 嘅以戰迫和

發表迴響

你的電子郵件位址並不會被公開。 必要欄位標記為 *