兩韓峰會-min

兩韓峰會 :點解中國做咗輸家

兩韓峰會 取得成功,雖然好多具體內容,應該留番俾Trump攞彩,但可以肯定係,呢次中國係大輸家,當然好多大中華膠都唔知 兩韓峰會 中國輸乜。但如果你對朝鮮半島宗主權嘅歷史有啲認知,都會明白,呢次中國嘅輸,唔比1895年失去朝鮮王國宗主權嚟得甘。

兩韓峰會 宣布中國宗主權結束

喺2010年,我喺新加坡《聯合早報》寫《中國應有秩序讓南北韓統一》果陣,我係有就大明帝國、大清帝國喺朝鮮半島宗主權作出研究,朝鮮半島中國係視為京畿嘅戰略緩衝地帶,呢個係肯定,所以我基於呢個設計,提出以大韓民國嘅中立,換取北韓併入南韓,雖然呢個未必係對大韓民國最佳決定,至少結束咗北韓呢個人渣政權,而金正日家族亦得到佢地想保住嘅富貴。其實中國要保持喺朝鮮半島局勢嘅話事權,喺金正日在生果陣就要作決定,依家2018年作出決定已經係太遲。因為一係金正日家族嘅政權自己瓦解,搞到一鑊泡,當時未計金正日居然有個叫金正恩嘅天才,竟然走去做亞洲第一賭能,山本五十六都做唔到嘅對美以戰迫和,居然俾佢做到。

中國要對朝鮮半島有話事權,一切要喺對朝鮮半島人民最有利嘅前提下至會有,朝鮮王國極忠於大明帝國,因為大明帝國極力抵禦豐臣秀吉嘅入侵,跟住大清帝國雖然係廢嘅,但當時俾朝鮮王國嘅人揀,佢地會寧願要大清帝國,因為至少大清帝國仲會尊重朝鮮人,日本人喺明治維新搞殖民統治嘅手段,其實學埋法國、西班牙果套,再加少少英國果套,差唔多時去到二次大戰前後,日本至慢慢可以開始消化朝鮮半島和台灣兩地。而依家,北韓人都知道跟住中國只係被人當人肉盾牌,但跟住美國會有好生活,而且好大程度上,美國都唔會過份干預大韓民國內部事務,大韓民國算得上係真正獨立國家。中國唔識適當時候放手,正係中國今日失去對北韓控制權嘅原因,當然名義上,中國都會參與和約,甚至會扮到支持南北和解,作為換取特朗普喺貿易戰上讓步嘅本錢,但實際上,邊個會理中國呢,大家都心中有數, 兩韓峰會 係一個歷史轉捩點亦係咁解。

發表迴響

你的電子郵件位址並不會被公開。 必要欄位標記為 *