Cova紙袋-min

Cova紙袋 之亂:住過歐洲就唔好伸手攞袋

有KOL攞唔到 Cova紙袋 發爛渣事件,本來不值一提,Cova服務態度係差,但係無幫襯問人攞 Cova紙袋 本身件事亦係核突,海港城大把袋俾你攞,專登攞 Cova紙袋 令我十分之起疑。但件事無公共性,我唔想浪費空間。但事件KOL被圍攻,圍到有熱普城嘅白痴參戰,咁我覺得係時候清理戰場。

Cova紙袋 唔俾係應該

如果果位KOL唔係一位聲稱住倫敦嘅人妻先生,我諗我未必鬧佢,香港有伸手攞袋嘅習慣。但佢住倫敦,呢件事十分之唔好意思,歐洲,一般嚟講,膠袋、紙袋買嘢果陣係俾錢買,係好貴嘅名店,你幫襯至會俾袋你,呢個係歐洲居民應有常識。既然你歐洲都應該慣咗自己帶袋出街,你做乜返到香港攞唔到袋發爛渣,咁你學乜人標榜喺倫敦住,返去早抖喇,呢啲唔係KOL,係LOL。你試吓喺德國大鬧Cova話唔俾 Cova紙袋 你,你睇吓其他人有啲乜反應你,德國係一般超級市場,好似REWE呢啲,個紙袋都收番你幾毫子歐羅。喺歐洲買買吓嘢發現唔記得帶袋,最常見情景係立即入超級市場,或Rossmann、DM之類商店(類似屈臣氏、萬寧),幾毫子買個袋。講真,你去海港城間Citysuper都有袋喇。

而成件事令我最起疑係點解一定要 Cova紙袋 ,因為台灣有拍賣網,係將啲 Cova紙袋 攞去賣,大概開價二百新台幣,點解有人買,我唔知,可能有炫耀之用,但如果商鋪發現自己嘅袋,有可能被顧客或其他人轉售,喺俾袋政策上更謹㥀係肯定,大佬,我點知你個袋攞嚟做乜,唔通俾你做無本生利生意,你估一個紙袋嘅印製成本真係幾毫子港紙呀?幾毫子仲話豪俾你,但依家好明顯,果個紙袋,有轉售價值,而成本亦唔係幾毫子港紙,商戶係絕對有權,亦唔應該俾個紙袋你,道理其實係十分之簡單嘅一件事。

當然,同熱普城相關果啲KOL,好多都以為自己做咗KOL可以隨便亂講,而啲公關都要買佢怕,好多時我自己私人受氣嘅事,都唔喺個blog或page度講,呢啲尺度問題都唔睇實學人做KOL,都係果句喇,呢啲友仔做LOL就有份,有報紙仲俾地盤佢,呢個世界真係可以好荒謬。

One thought on “Cova紙袋 之亂:住過歐洲就唔好伸手攞袋

  1. 阿bitchy KOL倫敦人妻先生終於忍唔住block左啲異見人士,好多留言唔見晒,唔夠人講就block人 😆😆😆😆😆

    #獨裁過共產黨

發表迴響

你的電子郵件位址並不會被公開。 必要欄位標記為 *