柯文哲-min

唔識 柯文哲 做過乜就唔好亂評台北政局

有時好怕啲香港人評台灣政治,雖然我好少喺呢度講台灣政治,但大家都知,我係少數外籍香港人,喺台灣深綠報章《自由時報》寫嘢,我寫係當中不少係台灣內政,一般嚟講,如果我研究唔夠寧可唔寫。而好多綠營中人好憎 柯文哲 ,但我可以講, 柯文哲 喺短期內好難隊得冧,隊冧佢亦唔符合綠營利益。睇台灣電視台啲名嘴亂講就以為 柯文哲 好唔掂,我諗你班友唔知依家台灣發生乜事。

柯文哲 係李光耀以後最難對付政客之一

柯文哲 我一直都用「派膠版李光耀」形容佢,因為佢嘅包裝極騎呢,我相信我同佢有得揮(我唔怕認自己膠),但 柯文哲 有兩樣嘢好恐怖,首先, 柯文哲 係一個極度實用主義者嚟,佢果種對中國態度,其實係李光耀嘅翻版,呢種手腕唔少台灣人受落。另一樣嘢係, 柯文哲 嘅市政執行力特別強,特別交通改革尤其明顯,千二台幣食到飽套票係擺明將歐洲果套搬入台灣,當然佢將阿姆斯特丹果套單車道管理引入台北,我好有保留,但以 柯文哲 嘅草根膠力,加上佢嘅政策執行力之強,對民進黨嚟講,令 柯文哲 連任唔到台北市長,結果隨時係佢變陳水扁翻版,馬英九喺台北市長戰擊敗陳水扁係國民黨重大嘅戰略失敗,果場仗變相送阿扁入總統府,係台灣政壇一場因小失大之戰,所以隊冧 柯文哲 一啲著數都無,所以將 柯文哲 鎖死喺台北市府係對民進黨最為有利,好多綠營大老唔接受,但喺戰略上,特別保住小英政權嘅高度, 柯文哲 留喺台北市政府係 necessary evil 嚟,根本係無辦法。

好多時台灣啲名嘴,同香港啲名嘴一樣咁不堪聽,因為佢地會因自己嘅利益,或私怨而設定立場,唔做好研究就亂寫亂講一通,其實大家睇PTT就明, 柯文哲 係長期維持到高人氣,特別佢果套特有KO名嘴,當名嘴隱形嘅方式尤其犀利,台北人一早對台北市政被藍營搞到一鑊泡忍咗好X耐,而 柯文哲 你認唔認同都好,佢係好有效作出撥亂反正,而且佢好多時將外國果套搬入嚟,唔係陳水扁係自己嘅原生發明,反而喺台北呢個崇拜媚外嘅天龍國城市係行得通,至少成日言必提美國嘅大安文山深藍中人無藉口反對。所以, 柯文哲 連任,好大機會係戰略同形勢使然。

發表迴響

你的電子郵件位址並不會被公開。 必要欄位標記為 *