海鹽-微塑膠

海鹽 都派膠:無微塑膠政策嘅香港同中國

海鹽 一直以為,大家都以為好健康,因為製程一定有過濾,同埋, 海鹽 有豐富嘅碘,只不過,依家中國自己嘅化驗都顯示,好多 海鹽 含有呢個微塑膠,即係啲鹽日日都派膠俾你,你又喺度食緊膠,呢劑就真係唔慌唔變膠人,因為你身體有好多膠。

海鹽 唔派膠有賴環保政策

當然中國製嘅 海鹽 有膠,就同中國廠商啲技術,以及中國沿岸嘅海水污染有關。其實西方國家,早幾年已經知道微塑膠絕對係問題嚟,而微塑膠最攞命嘅來源,係女士化妝品用嘅磨砂,果啲係微膠粒,而且經污水系統直接沖入河道或大海,污水處理廠都未必濾到佢地,更加唔好講果啲水裡面嘅塑膠垃圾,因磨蝕而釋放嘅細膠碎。所以,美國、歐盟、台灣禁晒用塑膠微膠粒嘅化妝品,香港到依家乜叉都唔做,完全唔知做緊乜,更加唔好講中國嘞。取締日用品嘅微膠粒,呢個係防止大家繼續食膠做膠人嘅第一步,如果呢步都唔做,咁樣日日食咁多膠落肚,大家應該唯呢個膠政府是問。當然,依家就要拒絕用微膠粒嘅日用品,呢個係最基本嘅一步。

但我睇,中國係唔會喺微膠粒政策上有任何進步,所以香港有乜好做,得兩個選擇,一係食岩鹽,但碘就一定唔及海鹽,一係食日本 海鹽 ,當然有人會擔憂福島問題,日本海水無錯有福島工場,咁你可以買得到清真認證果啲,因為清真認證嘅 海鹽 喺兵庫縣(神戶),或者九州熊本做,咁就無呢個問題,詳情自己睇日本海水嘅網頁。甚至買紐西蘭嘅鹽都得,喺香港嘅超級市場,係有外來入口嘅 海鹽 ,當然比起中國貴唔少,但喺微塑膠搞唔掂嘅今日,你要食鹽定食膠。

同埋啲廢老如果再講我食鹽多過你食米,喺 海鹽 都有唔少膠粒之下,你可以新嘅反駁方法:「阿叔,聽聞鹽好多膠粒,特別喺偉大祖國出產嘅鹽,就特別多,你係唔係想講,你食膠多過我食米,唔怪得你咁X膠。」,我相信對方聽完之後,一定火氣同血壓都迅速上升,唔係講笑。亂咁用我食鹽多過你食米嚟大啲年青人,依家就踢中鐵板,呢個真係要感謝偉大嘅黨建設嘅偉大祖國,都係果一句,果然係「厲害了,我的國」,其實空耳聽應該「你害了我的國」。

發表迴響

你的電子郵件位址並不會被公開。 必要欄位標記為 *