核心技術是國之重器-min

星期日休息:明知 核心技術是國之重器 點解搞成咁

喺中興通訊危機後,習近平終於出嚟回應,佢講咗句 核心技術是國之重器 ,要求中國公司要唔再用偷人技術嘅政策,而係要自己做好核心技術嘅工作。 核心技術是國之重器 人人都識講,只不過,依家中國搞成咁,其實四個字就可以總括:急功近利,所以核心技術,中國從來都唔做好。

核心技術是國之重器 對中國人係笑話

工業革命係發源自英國,但今日歐洲保留住尖端工業技術,係德國、意大利、法國,英國已經唔係領先工業國家,只剩番噴射引擎係有真正優勢。無錯,喺工業革命初期,德國係咁抄英國嘢,但德國將傳統學徒制度,同新興工業緊密結合,今日德國仍然好重視工業技術教育,而英國搞金融,放棄晒工業基礎,到咗今日,德國、法國、意大利呢啲將工匠制度留喺工業世界嘅國家,仍然係首屈一指工業國家,但英國已經唔係。核心技術呢家嘢,係唔適合追求快錢嘅民族或國家。唔計有最講理想嘅人,同最急功近利嘅人都有嘅美國,其實留得住核心技術,都係相對有匠人精神嘅國家,因為技術呢樣嘢,可以唔會發達,一如日劇《陸王》果間小鉤屋。

問題係,中國人籌到一大筆錢,會開發乜嘢技術?大家睇吓馬雲咪明囉,一係抄抄抄,然後用財技賺一大筆錢,一係做一啲同核心技術無關嘅事,總之要賺快錢,當成日產業都係呢啲人果陣,特朗普要玩死你有幾容易啫,工字唔出頭,簡直係華人社會嘅腐化觀念,實際上,你無實淨嘅技術,你根本乜嘢都唔係。依家習近平至知 核心技術是國之重器 ,我心諗,你條友遲唔遲啲,一早中國社會已經出咗事。

甚至呢種出事可以上溯至大清帝國,大清帝國年代嘅洋務運動,點解最後係清日甲午戰爭輸咗台灣、朝鮮半島,甚至爭啲連遼東半島都輸埋,因為當時追求嘅船堅炮利,其實係完全無社會改革基礎,簡單嚟講就係一堆國有企業,再買一堆洋貨了事,同日本徹底改革教育、政治制度、生活習慣等完全唔同,成班友OS連kernel都唔換監粗行,人地日本就換晒kernel,一個出事,一個唔出事咪咁解。大家仲記得Windows 95同98有幾膠,點解會膠,因為Windows 95, 98都係喺MS-DOS嘅基礎上監粗行上去,咪炒粉不斷。Mac就知System 7係咁上去一定出事,所以Mac OS X至徹底用FreeBSD為基礎嘅核心,依家咪行得一切無事。換OS Kernel係好痛苦,但如果OS Kernel都唔換,結果就係膠事無窮無盡,而依家嘅中國,就係用緊大清帝國Kernel嘅OS,一路加建共和國、共產制呢啲GUI,依家大家睇到,有啲事就會hang爆機。

所以 核心技術是國之重器 正確講法係, 核心文化是國之生命,而中國成個核心文化係出咗事,但無人想改個OS Kernel,原來所謂派人放洋留學,甚至中國改咗現代教育制度都係咁,其實成件事係好有問題。日本就係OS Kernel只係部分改造,所以後嚟出現二次大戰軍國主義嘅問題,到依家日本社會都仲有唔少問題。大家諗吓,依家侵總統三兩下手勢,就將你中興同華為成間公司KO咗,就可以睇到OS Kernel唔改係有幾大鑊。

只不過,中國人唔會改果個OS Kernel,大家諗吓1895年戰敗,結果竟然係義和拳運動興起,然後1900年搞出八國聯軍圍攻大清帝國。2018年中國喪失朝鮮宗主權,再加中興華為被人揸春袋,我相信結果都係另一場義和拳運動,甚至啲五毛,可能被一啲仆街利用嚟推翻習近平,然後屆時又嚟另一單八國聯軍圍攻大清帝國,歷史只不過會不斷循環落去,因為OS Kernel唔改,就成個人類行為唔改,錯誤就會重覆發生,件事就係咁簡單。而我睇唔到,依家以為中國好X強大嘅飛機友,係意識得到自己果個OS根本係一堆蟲喺晒度,係唔會搞到依家咁膠喇,大家話係唔係?

所以習近平講得出 核心技術是國之重器 證明佢走唔出大清帝國洋務運動嘅怪圈,你認為中國會有核心技術,我只會睇到中國會有核心硬膠,仲要好硬果隻,我睇唔到中國會有乜希望,你睇俄國搞完震盪療法嘅死款,呢個地球其中一個大bug點樣可以debug成功,呢啲技術我堅係識條鐵。

發表迴響

你的電子郵件位址並不會被公開。 必要欄位標記為 *