南方-德國領事館

南方 定南部:德國領事館抽水嘅背景

教育局亂咁改課本,為咗符合「一國」嘅框架,將香港喺中國 南方 ,變成中國南部,當然,喺共產黨角度,佢地係想用南部呢個字,反映香港屬於中國嘅關係。而德國領事館出手,抽水用巴伐利亞喺德國南方。呢個係抽人自抽,我有必要簡介呢件事喺德國歷史或文化角度一啲背景,我都係認知皮毛,有乜講錯唔好見怪。

巴伐利亞何以喺德國 南方

巴伐利亞(拜仁)喺德國嚟講係有啲奇,州旗掛到一街都係,拜仁慕尼黑標誌中間藍白格仔正係拜仁州旗嘅圖案嚟,拜仁德語係同標準德語兩回事,巴伐利亞有啲做法,成日成為德國其他州份嘅人嘅恥笑對象,而CDU係唔會入拜仁州議會(Landstag)爭飯食,原因係,巴伐利亞一向好有自己嘅自主性,情況同香港類似。

當年巴伐利亞本來想同奧地利帝國聯盟,喺普奧戰爭,巴伐利亞係企喺奧地利帝國果邊,當然最後奧地利衰咗,巴伐利亞侷住同普魯士一統,但當時普魯士俾巴伐利亞行一國兩制,巴伐利亞保留部分外交權利、部分軍事權利(戰爭期間至歸中央政府)、甚至鐵路、郵政都係獨立,所謂保留權利(Reservatrechte),甚至德意志帝國中央政府喺一次大戰尾聲果陣仲未被革命黨人搞掂,拜仁佬已經趕走咗個國王,變成咗共和國,所以 巴伐利亞計係德國 南方 ,呢個中性用字,係合符歷史,如果香港同拜仁類近,都應該如此處理,呢個亦係中共啲人蠢到無倫嘅原因,雖然依家郵政、軍事同外交都統歸聯邦政府所有(鐵路就好複雜,但德國唔同地方鐵路事權一般歸當地嘅交通協會(Verkehrsverbund)管,係跨省ICE, IC, EC等至係聯邦政府管),但巴伐利亞依家獨立性仍然好強,而且有成三成人仲係想獨立,所以德國領事館抽水嘅背景係,你中國人喺一國兩制上面走數,今日好多拜仁州嘅保留權利都無咗,但德國政壇普遍尊重拜仁州嘅獨立性,甚至CDU係唔入CSU地盤爭國會或地方議會議席,都係咁解。

德國領事館一般唔抽當地內政水,2014年後頻頻抽水(呢個亦同德國嘅人口有關,德國政府可以由戶籍系統,知道有幾多有歐洲議會投票權嘅BC/BNO住緊德國),而喺去年選舉後嘅組閣談判期間暫停抽水,依家又開番抽水機,德國政府係有一個好清晰嘅香港政策同目標,但識唔識睇,就好睇你就德國文化同政壇嘅認識。

One thought on “南方 定南部:德國領事館抽水嘅背景

發表迴響

你的電子郵件位址並不會被公開。 必要欄位標記為 *