敘利亞-化武-min

星期日休息: 空襲 敘利亞 到香港國際新聞編輯的墮落

我雖然係主流傳媒出身,但喺對香港傳媒立場上,我好多時都同膠事錄立場相若,特別喺呢啲香港傳媒處理國際新聞嘅立場上,基本上,香港傳媒嘅國際新聞係有毒,根本唔可以睇。而 敘利亞 空襲事件上,我認為香港啲傳媒,有部分處理係失德嚟形容。

敘利亞 空襲新聞嘅來源亂咁嚟

當然,你可以認為CNN,BBC呢啲同侵總統做襯家嘅媒體係fake news,但有一點可以肯定,由普京控制嘅Russia Today係絕對唔可以作為可信新聞來源,因為佢係一個非民主政體下嘅政府控制新聞機構,財政來源嚟自政府,如果呢啲傳媒都信得過,真係豬乸都上得樹。但依家最恐怖一點係,香港有傳媒居然唔理Russia Today嘅背景爛成咁,都照用佢嘅報導,呢啲唔係專業失當係乜嘢,我睇唔到第二樣嘢。

其實呢啲新聞來源不知所謂嘅狀況,唔係第一鑊發生,成日有中文傳媒攞歐洲時報、日本新聞網呢啲由中國政府俾錢喺海外搞嘅垃圾作新聞來源,呢件事我已經聽到爆。喺歐洲,歐洲時報同華商報都係傻佬至睇,如果德文地區嘅權威新聞來源,如果你怕德國之聲嘅中文稿件有問題,就係直接睇德文公共廣播機構嘅報導,但仲要有人要攞中文垃圾,我只能懷疑,香港好多報館啲高層,日日問中聯辦收柯打做人,做人做鬼都唔知。

令我懷疑香港啲中文傳媒係收中聯辦柯打做人,連做國際新聞都係,其實仲有一件事,就係香港傳媒近年有股歪風,就係凡中文譯名都必定要跟新華社譯名,除咗英國嘅官員譯名,因為一直有跟英國駐港使館官定譯名嘅傳媒,同埋親英派都可以對香港傳媒構成一定壓力外,一去到馬來西亞果啲譯名,明明有馬新社官方譯名都可以亂嚟,例如納吉叫納吉布,首相變咗總理,係連本身係大馬資金嘅《明報》都可以犯呢挺黐線錯誤,咁呢啲唔係無知搞出嚟嘅問題,係有人收中聯辦柯打做嘢,要跟新華社命令去污染香港語文水平有關。我睇唔到新華社喺譯名上有乜權威性,請問果啲垃圾採主可唔可以話俾我聽,點解一個公信力同RT一樣咁垃圾嘅新華社,喺中文譯名上有權威性,你話跟台灣中央社,都仲有少少勉強收貨嘅可能性,但跟新華社本身,就堅係除咗黐線之外,我睇唔到仲有乜嘢合理解釋。

香港國際新聞呢班編輯,我睇到係墮落,佢地本來要負起擴闊香港人視野嘅重任,但佢地為咗份工,就變得墮落起嚟。如果為咗份工都算,有啲國際新聞編輯係更衰,因為佢地本身嘅左膠意識形態,所以詮釋國際新聞果陣亂晒大籠,唔理當前嘅事實,呢種情況係我最唔能夠接受。真係難聽講句,唔通左膠真係大X晒㗎。有啲人,我無謂點名,但有人仲好意思喺果啲網媒寫國際新聞,扮晒國際專家,我就覺得呢啲嘢堅係夠喇。

做乜嘢國際新聞、國際關係專家,唔係靠乜嘢名牌大學學位,亦唔係靠左膠嘅熱血,亦唔係果啲接受中共任務嘅偽專家,其實一般讀者都可以對國際新聞有一個比較透徹嘅理解,英文好嘅,唔該唔好睇嚟睇去都係衛報、紐約時報、CNN,英文傳媒百家爭鳴,睇到你飽都仲得。識得歐洲語文,例如德文或法文,唔該擴闊視野,睇埋佢。因為英文傳媒嘅視野,本身都係有一定嘅局限喺裡面。同埋,最好係對西方歷史有一定認識,當你知道西方歷史嘅發展,有啲嘢點解發展到咁膠,本身唔難解,而左膠果啲垃圾論述,亦好容易被攻破,因為左膠嘅論述,本來就建立喺浮沙之上。

我本身住德國,喺香港長大,但本身又有南洋身份,又可以喺台灣同新加坡報章以外人身份,評論番當地內政,我真係某程度上,係用HSBC口號嘅the worldʻs local bank果種邏輯邁進,我諗我會想學做the worldʻs local commentator。呢個仲要有一樣嘢,就係在地視野,你要學習了解當地人係點樣分析問題,你用你自己嘅角度去分析件事,係一百世都唔會明,呢個亦係點解我咁憎中國,都會知中國語文一啲gag點解,或者研究中共黨史嘅原因,但香港啲傳媒人,我認真唔好意思,你地有啲嘢堅係亂嚟,可能大家集體唔睇呢啲所謂國際版,自己喺互聯網上搵啲有營養嘅嘢,會比較環保,唔會浪費能源喺呢啲有毒材料上面。

One thought on “星期日休息: 空襲 敘利亞 到香港國際新聞編輯的墮落

  1. 稱呼加拿大、澳洲、紐西蘭、馬來西亞等國的政府首腦做總理,是否顯示那人反對君主制?

發表迴響

你的電子郵件位址並不會被公開。 必要欄位標記為 *