內涵段子-min

內涵段子 與黑天鵝

雖然我係親英派,但我本身都係研究中共黨史同中國政治,而有一件同中國政治有關嘅事,好值得攞出嚟講,除咗經濟會引發支爆,亂咁冚網站都會搞出支爆危機,而習近平傻到冚咗 內涵段子 ,就好明顯係傻咗,兼且對香港政治有所啟示。

內涵段子 都冚,爛gag都唔俾你講

所謂段子,即係笑話,所謂 內涵段子 ,即係冷笑話,大家可以諗吓,本來 內涵段子 係乜嘢地方嚟,就係一個專講爛gag嘅地方,大概概念同9gag類似,只不過香港搞9gag搞到全世界都用佢(仲有一堆擺明香港粗口嘅domain作內部使用),而 內涵段子 主要喺中國。因為果啲中國語文嘅爛gag,真係佢地先睇得明,或搵到膠力所在。

段友出征,寸草不生,呢八個字,擺明係玩帝吧班五毛嘅,大家可以諗到呢個叫 內涵段子 嘅地方係一個點嘅地方,或者可以咁講,呢度係中國版嘅高登、連登,只不過高登、連登本來唔係講爛gag起家,高登只不過唔知點解聚集一堆膠人,結果變成一個講膠嘅地方,而 內涵段子 ,就擺明以爛gag招徠。

一個講gag嘅地方,以中國人嘅性格,你唔管佢,佢唔管你,因為 內涵段子 本來無高登或連登果種,類似黃易《邊荒傳說》果啲邊荒集嘅三教九流特性,最多呢班友講啲爛gag寸你兩句,只不過有人要玩大清文字獄,仲要維民所止,雍正無頭果隻文字獄,結果咪激出成班花生友出嚟,同穆巴拉克激出一堆打緊機嘅埃及人反佢一樣咁白痴。所以喺中國無晒動員力嘅今日,成棚 內涵段子 嘅爛gag人竟然突發響按抗議,你共產黨班友乜叉都唔知。中共依家最大真正對手,隨時就係呢班日日講爛gag嘅友仔。

當中國爛gag都唔俾講,其實香港必須提高警覺,如果 內涵段子 咁都冚,實有人要千方百計針對高登、連登甚至一百毛,都係果句,係爛gag都唔俾講,講吓都有罪果隻。所以《基本法》23條問題係一場決戰,絕對唔講得笑,因為依家土共係玩文字獄玩上癮。聲唔聲援 內涵段子 ,你們自己決定,因為中國人唔會感謝香港人,但必須喺 內涵段子 呢件事上,睇清當前嘅形勢。

發表迴響

你的電子郵件位址並不會被公開。 必要欄位標記為 *