上海仔-min

上海仔 用 YouTube 嚟劈友

有一單同 上海仔 有關嘅新聞,大部分睇完都要度過點寫,因為香港江湖史上搞到用YouTube嚟劈友, 上海仔 可謂開先河,佢大爆嘅內幕,好多喺香港討論呢件事,應該會光速收到律師信,所以啲人唔敢公開討論係正常,成件事實在太爆。

上海仔 段片政府係要回應

依家 上海仔 段片,啲人比較敢回應嘅部分,係關於黃毓民嘅部分,孰真孰假大家評斷。只不過,我純粹由保留新聞資料嘅立場,我建議大家係食花生前download晒段嘅內容先,以作研究之用,因為我相信好快有人要求 YouTube 刪晒啲片,你到時再上去睇就無得睇,而我都係咁講,依家係網上劈友,用 YouTube 嚟劈友,正常人有backup段片都唔會敢再upload返上網,嫌命長咩,定嫌自己錢太多?所以食花生前,自己backup,至於點backup,條片喺邊度搵到,大家自己用Google搞掂佢喇,識做嘅人係應該有得食花生,唔識做嘅,呢啲花生都唔啱佢地食,咁佢地就唔食好過食喇。

我都係戴頭盔果句, 上海仔 講乜,我唔知真假,有乜法律責任唔好拉到我頭上,未有法院判決前,任何人都係清白嘅,只不過, 上海仔 有部分指控係涉及政府,甚至一啲刑事案件,特別涉及警隊,保安局以及政府,係有必要回應涉及警隊嘅部分,依家係一個大家都知嘅黑人物,喺 YouTube 片段度,指控有警方高層同 上海仔 口中嘅另一幫黑人物有來往,咁政府首先要講, 上海仔 指控果啲人係唔係黑人物,以及警隊行事係唔係同某啲人嘅私人交情有關。呢啲指控,係絕對會涉及警隊嘅公信力嘅,雖然依家咁多休班警、當更警爭住犯法,香港黑警剩番幾多公信力,我睇都十分之成疑問。此外, 上海仔 段片有部分涉及一宗刑事案件嘅內情,係唔係律政司要回應一下,我相信好多人都想知。

當然,喺香港無人敢用 YouTube 劈友下, 上海仔 竟然開先河,仲要將佢啲聯誼活動片段都攞埋出嚟,咁樣玩大攬炒,究竟邊個俾個膽 上海仔 做賭撚,相信呢個亦係好多香港人想知嘅問題,睇嚟一場大風暴至係啱啱開始。

發表迴響

你的電子郵件位址並不會被公開。 必要欄位標記為 *