Trump-Syria-min

Trump 決定出兵敘利亞:一早應該

Trump 對敘利亞嘅局勢終於忍無可忍,喺Twitter打開口牌,會出導彈打敘利亞, Trump 仲直頭叫敘利亞班友係 Gas Killing Animal,呢個係好口臭,好唔客氣嘅講法。當然, Trump 對自己嘅武器好有信心,Smart係關鍵,一貫 Trump 對住北韓金正恩果副牙刷口脗,極富 Trump 嘅一貫本色。

Trump 根本一早要出兵敘利亞

對於敘利亞呢個人渣政權, Trump 出兵係叫遲咗,其實係一早就要出兵,依家搞到歐洲成村敘利亞難民至出兵,已經係遲晒。

阿薩德嘅問題係,佢自恃有俄國、中國、伊朗同北韓四個邪惡政權撐腰,加上歐洲左膠當道,唔敢出手,所以以為自己可以用化武為所欲為。但佢睇錯兩樣嘢,無錯, Trump 口臭、好色、講嘢唔經大腦,美國好多人有嘅問題佢都有,但佢亦有美國人一樣嘅基本特質,就係對一啲做嘢太過份嘅仆街果種咬牙切齒,呢鑊係佢任內第二鑊見到化學武器襲擊平民,所以佢一定出手,唔出手就出奇。而歐洲亦唔想再有難民潮出現,歐洲意識到阻止難民入嚟唯一方法,就係敘利亞變成一個正常國家,而呢次由法國出手係合理,因為歐盟英國以外有實際軍事控制力係法國,而敘利亞係前法國屬地,由法國嚟出手亦順理成章,相反,由德國出手就會面對一大堆憲法方面嘅制肘,而德國聯邦國防軍Bundeswehr,守衛國土仲得,你叫佢出去打人就爭啲,特別係戰機同飛彈出手。法國依家嘅總統又唔係一個純左膠總統,佢都有一定弘揚法國國威嘅意志,所以美法聯軍,順理成章。

當然,普京唔會放棄敘利亞,因為呢個係俄國喺地中海唯一出海口,一旦失去敘利亞控制權,唔通靠土耳其呢個一直有牙齒印,依家仲係北約成員嘅古惑仔咩。但問題係,普京根本無意控制阿薩德條友亂嚟,我相信除非普京想打第三次世界大戰,否則敘利亞會同塞爾維亞一樣,先行瓦解,然後脫離俄國控制變成西方世界嘅一員。我相信美國會俾敘利亞庫爾德人建國,換取庫爾德人放棄喺伊拉克同土耳其立國。呢樣嘢,係可以傾返嚟嘅。但敘利亞瓦解,似乎將係定局,而且敘利亞瓦解,以色列永遠佔據戈蘭高地就唔再係問題,一家便宜幾家著。

發表迴響

你的電子郵件位址並不會被公開。 必要欄位標記為 *