公開信-DSE

公開信 無教就唔識寫?唔係嘛

今年DSE實用文卷三,出現有少少破格嘅內容,就係考寫 公開信 ,跟住有教師話,無教過 公開信 點寫喎,怕考生唔識考。我真係想講,如果無教過就唔識寫,呢啲教師仍然停留喺八股文年代教中文,學生無論喺試場定市場,都真係祝佢好運。

公開信 其實係考乜

其實 公開信 係成街都係嘅文體,本身格式要求唔多,一如啲老師接受傳媒訪問所講,其實格式佔嘅分好少,相反,考 公開信 係教乜,其實就係平日有無睇開呢啲 公開信 嘅原文本,唔係睇果啲經過傳媒記者因應自己要求剪裁過嘅版本,其實喺Facebook、報紙、網站周時都有,同以往唔同,以往如果你睇報紙唔睇廣告,我恐怕你都幾難知 公開信 係乜東東,但依家Facebook各黨派間開片都會出 公開信 喇,要用乜語氣寫,要點寫至好,係唔係唔教就唔識咁大鑊嘛,如果香港學生去到依家DSE年代都仲係唔教唔會識,或者補習天皇教過先會識,咁唔識玩喇。更何況喺通識科果度,應該接觸過唔少 公開信 嘅材料添,唔可以講啲學生完全無學過。

其實點解最初中文科要廢範文,因為實際上,喺依家呢個年代,應該羅列學生基本要掌握嘅skill同水平,但實際要點學習係各師各法,因為現實之中,你使用語文,可以因應極千變萬化嘅要求,所以內功重要啲,亦因為咁,如果係要保留範文,都係文言文嘅經典篇章,而唔應該係果啲未經歷過長時間冼練嘅,中國五四運動後嘅文學,就算要學,就不如一跳跳到同現代香港語文息息相關嘅香港語文歌詞好過(呢個亦係杜絕再普教中嘅唯一方法,因為用華語讀,你唔知果啲歌詞講乜,除非果位學生自修香港語文)。應用文,係更加唔應該教咗就識,唔教就唔識,因為 公開信 ,仲有現代商業電郵嘅寫法等等,日新月異,唔通好似以前教尺牘咁樣教,邊應付到時代嘅變化。

有時候,香港教育界嘅古板思維,真係香港競爭力嘅真正挑戰,特別中文、中史一類嘅科目,啲思想古板或邏輯混亂嘅友仔特多,真令人頭痛。搞得唔好,教香港語文呢家嘢,真係家長自己睇實啲好過交俾啲老師去操刀。

發表迴響

你的電子郵件位址並不會被公開。 必要欄位標記為 *