關愛座-min

關愛座 嘅是是非非

一架由小西灣去黃大仙嘅九記106巴士,有廚工坐 關愛座 唔肯讓俾你一個肥仔嘅年老阿媽,搞到打交收場。單案嘅案情係點,有待閉路電視影帶澄清,但香港 關愛座 呢家嘢,已經變成咗公害。同香港啲老人家嘅心態,以及大家對 關愛座 嘅理解錯誤有關。

關愛座 唔係敬老座

喺德國,無 關愛座 呢個概念,德國已經係數一數二嘅人口老化大國,你主動讓座俾老人家,好多時老人家係選擇唔座,反而孕婦就個個都曉讓。因為 關愛座 原意係俾啲身體狀態唔好需要座位嘅人坐,但香港人將佢扭曲成為敬老座,我想問,老人家係唔係奉旨一定要坐,如果果位老人家行動不便,例如揸住拐杖,我認為係有必要讓個座俾佢,但如果老人家中氣十足,企喺度無問題,我並唔認為老人家有任何第一優先坐 關愛座 嘅理由,佢同其他俾足錢嘅乘客無分別,所以,我有必要同啲老人家講,你要享受 關愛座 嘅福利前,你問問自己係唔係真係需要先,否則等同濫用,結果就係公眾對 關愛座 強烈反感,最終結果係廢除 關愛座 免招是非。

另一方面, 關愛座 立法係黐線,一方面係浪費警力,另一方面,全世界大部分國家嘅 關愛座 係Honour System,讓座係人情,而用果個值唔值得受讓,都係睇佢自己嘅良心。一旦立法規定,就拗到天荒地老都未拗完,簡直係黐線之霸。所以邊個膠人提出要 關愛座 立法,果條膠人一定要丙, 關愛座 唔係咁用, 關愛座 只不過係希望公眾能夠喺俾一啲有需要嘅人坐一啲比較方便佢地嘅位置,一旦變法律,大家諗吓,如果有人濫用 關愛座 ,又駛唔駛被人拉,乜嘢叫做濫用,真係我諗唔到呢啲爭論可以有幾膠,隨時仲膠過呢單巴士毆鬥案。

公眾係有必要搞清楚 關愛座 嘅真正目的同實際用途,概念唔清嘅結果只會得個膠字,對於孕婦,有腳部傷患嘅任何人,俾佢地坐 關愛座 幾時都係應有之義,相反,如果係老人家,就要睇實際健康情況,其實同大多數人應該係一視同仁,因為 關愛座 唔應該係敬老座。香港如果日後越嚟越多人唔想敬老,老人家應該撫心自問,佢地平日究竟做咗幾多「好事」出嚟犯眾憎。

發表迴響

你的電子郵件位址並不會被公開。 必要欄位標記為 *