升降機-min

香港嘅 升降機 保養問題

香港啲 升降機 問題真係開始膠化,海灣花園嘅 升降機 竟然玩到又有住戶頭都撼穿要入醫院,雖然 海灣花園 話換緊電梯,但好明顯係成堆依家由蒂森克虜伯睇嘅電梯保養搞到屎嘅一樣,結果咪膠完又膠,沒完沒了。

香港 升降機 安全嘅問題

先講海灣花園電梯問題背景,原本發展商係用韓國Dong Yang電梯,但呢間公司後嚟俾蒂森克虜伯收購咗,蒂森克虜伯搞鋼材係叻,但佢地喺香港嘅電梯保養業務完全不敢恭維,香港好多由佢地負責維修保養嘅 升降機 都係一鑊粥,但你搵第二間公司做,特別啲細公司,佢地對呢啲冷門牌子嘅電梯識條鐵咩,用埋啲唔知邊度嚟嘅零件,結果咪出事又出事。香港好多大廈業主立案法團,大維修亂駛錢,但 升降機 保養就唔肯用錢,用埋啲騎呢公司,真係香港無搞到新加坡咁經常全屋苑壞晒啲電梯,咪叫好彩。

德國好多細公司自己建 升降機 ,好多舊大廈用緊啲1956年嘅升降機,但一切保養良好,除咗德國工程技術水平外,仲有一點好重要,德國嘅電梯年檢,唔係電梯保養公司自己簽,而係獨立交俾TUV做,大家一定睇到TÜV嘅貼紙至安心。一個類似TÜV嘅獨立公證機構,去確保 升降機 嘅安全係至為重要,如果啲註冊工程師係電梯保養公司啲員工,你覺得成個安全檢查有公信力同有用,咪玩喇。依家香港所謂嘅 升降機 安全監察制度,個准用證嘅資料仲少過英治年代果啲,唔知邊間公司公證,唔知邊個工程師簽嘢,呢啲叫有公眾監察,我喺德國,係未聽過斷鋼纜、升機降直上天台呢啲怪事,好明顯,香港成個制度根本出咗問題。

依家香港討論民生問題有一個好大麻煩係,政府好鍾意引外國例子,只不過誤導性嘅外國例子多,跟住好多香港人無錯住過西方國家,但佢地唔去了解西方國家唔同民生項目嘅每一個細節,睇吓有無香港可供借鏡嘅地方呢,成棚人用大筆錢去外國讀書,但一啲嘢都無帶返嚟香港,有時諗起都覺得慶,當然傳媒又係廢嘅,又唔肯帶起討論,所以香港人遲早日日搭 升降機 出入都要膽搏膽,因為制度崩壞到一個前所未有嘅程度,你堅懷疑仲有無制度。

5 thoughts on “香港嘅 升降機 保養問題

  1. 其實肯使錢都未必買到好服務,有時就算你用原廠保養,佢都竟然可以同你講需要既零件冇存貨,部電梯要停成個星期甚至更長時間去等舊零件運黎。完全難以理解做維修部門點解唔會有備料。

  2. 管治强如新加坡曾經亦係英殖民地的組員,筆者提及經常成屋苑出現停晒電梯,究其原因又係乜?

  3. RW﹕世澤之前寫過,認為其中一個因素係香港同新加坡都係睇唔起工人既地方(相反德國同北歐既技術工人,社會地位同人工同白領冇乜分別)、工人薪金慣性被壓低,於是請唔到合適既人。

    另一原因是我們慣性壓標價,導致根本不夠資源請足夠的技工去維修保養。

發表迴響

你的電子郵件位址並不會被公開。 必要欄位標記為 *