SNFC-罷工-min

SNCF 罷工: 私有化硬碰不得

本來想寫吓柔佛王儲講乜,但由於成件堅敏感到爆,所以我講吓一樣香港傳媒唔會講嘅話,法國 SNCF 大罷工,基本上,依家如果你去法國旅行都係唔好預坐火車,包括 SNCF 負責嘅RER路段,因為呢次罷工, SNCF 員工實同總統鬥過你死我活,啲人搭唔搭到車,都唔夠佢地嘅鐵飯碗咁重要。

SNCF 員工抗拒歐盟嘅自由競爭大潮流

首先, SNCF 嘅成本結構係好膠,而最膠喺員工待遇果度,大部分 SNCF 員工都享受等同公務員待遇,除非員工主動劈炮、退休或者病咗唔可能再做,否則無人炒到佢地,如果歐盟無話要鐵路改革還好,但依家歐盟部分國家已經完成開放市場嘅準備,好似德國直頭連Intercity一級都有公私營競爭,你法國仲玩呢家嘢就好膠。但歐盟嘅Single European Railway Area改革,2020年就一定要做到Intercity一級要係開放市場,咁就大件事,依家 SNCF 新員工仲享受緊公務員待遇。而 SNCF 已經無話郁舊有員工嘅公務員待遇,工會都視之為等同宣戰,咁你諗吓 SNCF 呢間退聯公司可以點改革。

依家講到呢度,大家就明點解當年日本政府會解散日本國有鐵路,變成七間JR公司,亦即係今日日本JR嘅基礎,當年日本國有鐵路又係工會勢力大到離晒譜,大到改革不能嘅地步,但如果JR仲唔改革,日本政府就唔破產都難,當年仲要係日本經濟好景嘅時候。日本佬政府仲可以話解散日本國有鐵路就解散咗佢,但法國佬,一個咁有勇武抗爭傳統嘅國家,你想改革 SNCF ,你想硬碰就得,無咁易囉。

呢次係睇到馬克龍總統究竟嘅手腕有幾強,但由德國經驗嚟講,德國DB由聯邦鐵路,同被共產黨搞到一舊屎嘅帝國鐵路(Reichbahn,你無睇錯,呢個同當年柏林地位有關)合併,跟住一路執手尾執到依家硬件啲手尾都未執完,經常因升級工程搞到啲火車班次亂七八糟,但市場架構係用咗廿年至執完,你依家馬克龍想一好快搞掂佢meet到2020年嘅大限,我堅祝法國佬好運,鐵路私有化從來都係高難度。

發表迴響

你的電子郵件位址並不會被公開。 必要欄位標記為 *