Münster-精神病

Münster 襲擊事件:精神病問題可能仲大鑊過難民

喺星期日休息前,我想update吓 Münster 襲擊事件,成單嘢嘅手法同恐襲一樣,但結果,呢單嘢同恐怖分子無關,係一個住喺 Münster 德國人有精神問題進行襲擊。對於極右分子嚟講,結果係咁,可能係十分之尷尬,IS對公眾嘅威脅,可能遠唔及精神病問題。以我喺德國生活嘅經驗,AfD講果啲可能變咗一個被人當成過份放大議題。

Münster 襲擊事件反映德國精神病資源投放夠唔夠

對於NRW州居民,第一時間諗起係恐襲係正常,因為2016年柏林聖誕市場襲擊事件情節十分相似,呢個亦係AfD得以攞到選票嘅其中一個遠因嚟。但隨住警方搵唔到其他主謀,相反,主謀自殺死亡,兼呢個人之前有自殺紀錄,雖然依家未有進一步資料,但呢單嘢一如NRW州警方所講,有可能唔係恐襲。而如果係精神病問題,就好多人都可以理解到,甚至我感覺係,不如投放多啲資源喺幫助精神病人身上,可能係比係咁怪罪難民更加有意義嘅一回事。我可以用我喺德國街頭一啲觀察,可以睇到。

喺香港,唔係話無精神病有關嘅罪案,只不過,你唔會喺條街度見到有精神病人無喇喇大喊,或者喺公眾場所做啲嚇人動作,但我喺德國嘅市中心地區,見過兩三次,仲要係唔同精神病人,如果我係會提起疑問係,究竟德國嘅醫療保險系統,係唔係有效率咁處理呢啲問題?

精神病人呢個問題,喺德國喺存在一段時間,喺香港,係有醫院令呢樣嘢,直頭強制精神病人唔可以離開醫院,即係香港《精神健康條例》一系列權力,但德國,喺精神病人強制接受治療係被認為違反人權,2013年至有法例制止病人唔肯食藥呢種行為,而喺德國,要喺法院申請醫院令係好煩嘅事,我喺德國成立公司同法院打過交道,對德國司法系統嘅效率十分之「印象深刻」,門檻高兼慢,大家可以諗吓,究竟啲炸彈係嚟自難民大啲,定係一個搞極都搞唔掂嘅精神病治療系統大啲。雖然啲精神病藥物,本身都係好多問題,需要作出檢討。

我諗當 Münster 真相越嚟越清楚,德國傳媒會有好多有關精神病人問題處理嘅討論。平衡公眾安全同病人權利,並唔係一件容易嘅事。

One thought on “Münster 襲擊事件:精神病問題可能仲大鑊過難民

  1. 香港唔會有精神病人無啦啦大喊或者做嚇人動作﹖睇你住邊區啫,公屋地方就間唔中有(因為佢地唔會住到私樓,只會被安排上公屋)。

發表迴響

你的電子郵件位址並不會被公開。 必要欄位標記為 *