雲海-蓋達組織-min

回覆 雲海 及其讀者:係清真言定恐怖組織旗

有 雲海 嘅讀者,有人喺獅子山舉枝印有阿拉伯文嘅黑旗,疑似拍嘢,跟住大家爭論呢枝係蓋達組織旗,定係清真言(Shahada)旗。作為一個研究南洋嘅人,我要睇番成張相嘅context做判斷,我相信,警方應該介入呢件事。

清真言旗被恐怖分子濫用

誦讀清真言,係回教徒必須要做,沙地阿拉伯嘅旗,印住同一樣嘅清真言,問題係,九十年代以嚟,清真言被恐怖組織濫用,特別係黑底嘅旗幟,呢個係聖戰組織喺上世紀九十年代開始嘅玩法。而 雲海 呢張相,第一個有恐怖主義嘅元素係一黑一白清真言旗都掛出嚟,白底係塔利班旗嚟,黑底係阿爾蓋達組織旗,而兩者係密切聯繫,互相支援,所以呢一點,已經可以懷疑圖中三位女士懷疑係為恐怖組織從事宣傳活動,反而純粹舉一枝黑嘅清真言,未必夠料去懷疑佢係從事恐怖活動宣傳。

跟住,果三位女士,用黑布遮蓋面部嘅比例十分大,幾乎只係露出對眼,呢種係原教旨主義嘅裝束,歐洲都係用安全為理由,部分國家禁止蒙頭蒙到呢個水平。所以如果呢單嘢發生喺新加坡,內部安全部(Internal Security Department)一早介入,拉人封艇。因為呢種拍攝手法,隨時涉及一啲自我激進化(self-radicialization)嘅人,新加坡都拉過幾個,你覺得香港無呢啲自我激進化嘅友仔,咪玩喇。

當然,香港警察對呢啲真正反恐係一無所知,只係識得老屈爭取民主嘅人係恐怖分子,因為有效反恐,唔係靠精良裝備,你搞到要同恐怖分子對戰果陣,其實已經太遲,因為呢班友根本唔怕死,甚至係渴望而戰死沙場嚟證明自己嘅價值,呢樣嘢正係聖戰士最恐怖嘅地方。反恐係要有人類學、歷史學等方面嘅支援,因為你無呢啲支援,你係判讀唔到究竟邊啲人係有組織嘅恐怖分子,邊啲係網上睇得太多黐線嘢然後走火入魔自己short咗,邊啲係一般回教徒,你要知道回教嘅歷史,習俗,唔同派系對可蘭經唔同嘅判讀,呢啲嘢,我都唔敢話自己係專家,就唔好講果班死差佬。所以,香港如果受恐襲而警察係雞手鴨腳,我一啲都唔意外,因為呢班友根本係唔曉嘅。

One thought on “回覆 雲海 及其讀者:係清真言定恐怖組織旗

  1. 但如果上網搵番ISIS支旗,ISIS支旗同相裡面果支好唔同,「萬物非主唯有真主」寫喺黑底部分,但另外有個白圈寫住「穆罕默德是真主的使者」。而英文維基都有話黑旗係回教徒廣泛使用既。

    不過的確係值得逗下佢地究竟拍緊乜,上次傳媒已吹過「ISIS招印傭」既風,差佬冇理由唔提高警覺。

發表迴響

你的電子郵件位址並不會被公開。 必要欄位標記為 *