天宮一號-min

天宮一號 跌落地球與「強國勃起」

相信近日其中一個熱門話題係中國嘅太空站 天宮一號 究竟幾時跌落地球,同埋邊個國家將會中頭獎,因為依家 天宮一號 以無序方式跌落地球,加上中國無話 天宮一號 上面果啲係乜嘢物料,所以全世界其實都係極有限資料下,估邊個中頭獎。

天宮一號 係無料扮四條

天宮一號 本來聲稱係要做到可控墜落,將佢推到Point Nemo,南太平洋中心,世界離陸地最遠嘅海洋地區,因為果啲係生物都少,咁樣就可以最大程度上減少對地球嘅衝擊,但2016年竟然相關裝置壞咗,跟住失去聯繫,跟住咪發生依家 天宮一號 跌落地球唔知邊個中獎嘅危機。同美國果次SkyLab解體,質量大好多,只不過,1979年果陣,果陣嘅可控太空站墜地技術係未成熟,係去到2001年和平號重返地球,至叫做成件事係十分之成熟,都係俄國人嘅成果嚟(無得講,太空站呢家嘢,俄國佬係做得掂,否則唔會ISS到依家仲係要俄美合作)。但依家係2018年,2018年都玩無序跌落地球, 天宮一號 呢個堅變笑話。

同樣係太空計劃出事,日本人嘅態度,同中國人嘅態度十分之唔同,隼鳥號探測小行星嘅衛星,可以講係堅多災多難,基本上,無乜人認為隼鳥號係可以重返地球,但日本人扭盡六壬,就係能夠俾隼鳥號重返地球(雖然無辦法做到原有目標,就係將收集樣本嘅密封艙投到地球後,再度起程,喺接近地球軌道下投放密封艙意味住隼鳥號只能提早結束任務), 天宮一號 跌落地球呢單嘢,其實講咗好耐,已經講到口臭程度,但中國工程人員,係完全無諗過令佢做到有序墜落,至少同俄國傾吓射隻貨船協助調整軌道試吓都好,就係無。

其實講到尾,就係中國自以為好威,喺太空站呢樣嘢上唔肯同國際合作,兼且學前蘇聯兼夾帶私貨,搞軍用用途太空站,唔肯將太空站民用化,咪無人幫你囉。就算係日本,佢本身有唔少太空技術嘅國家,喺太空站上都係玩ISS,而唔係自己獨食又唔通報全世界。中國呢種態度,係好多國際事務上,無人尊重佢嘅原因,依家 天宮一號 只係代表強國勃起,沒有乜嘢了不起。

2 thoughts on “天宮一號 跌落地球與「強國勃起」

  1. 實情係國際社會唔想侵中國玩,想當初國際太空站,美國,俄國,日本都因為怕技術被中國人偷師,而將中國拒之門外,你就講到好似今次事件中,中國唔想搵人幫,人哋肯幫你先得㗎,白痴!

發表迴響

你的電子郵件位址並不會被公開。 必要欄位標記為 *