金正恩

金正恩 訪華係攤牌

金正恩 突然訪華,出乎全世界意料之外,只不過, 金正恩 呢次訪華嘅時間都揀得十分高明,故意喺美國已經對中國宣布發動貿易戰果陣訪華,咁唔係祝賀 習近平 登基,而係乘機勒索,如果中國俾唔到 金正恩 想要嘅嘢,我估好快 金正恩 就會正式向美國投誠,除非中國出兵北韓。

金正恩 實際上玩乜?

其實 金正恩 想玩邊科,唔難估到, 金正恩 第一次提無核化,呢個一反北韓以往堅持核武自衛嘅講法,梗係唔係 金正恩 聽中國政府勸唔玩核武,而係有新嘅大佬提供安全保證,北韓至會夠膽棄核,而呢個新大佬,如果我無估錯,就應該係特朗普治下嘅美國,所以 金正恩 係俾面中國嘅前提下,通知中國北韓準備向美國投誠,除非中國滿足到佢嘅條件,北韓至會繼續做中國嘅戰略緩衝,而喺貿易戰開打果陣,做出呢種勒索行為係獲利最豐厚嘅,因為中國怕喺南海、台灣同美國鬥硬果陣,北韓係後欄起火,屆時 金正恩 就可以攞到佢想要嘅一切, 金正恩 可以講係亞太區首屈一指嘅古惑仔,佢呢個算盤絕對唔會死錯人,依家睇中國會俾啲乜出嚟。

但問題係, 金正恩 依家好可能係獅子開大口,中國自己經濟都唔多掂,南面又要面對美國嘅挑戰果陣,仲要面對 金正恩 嘅苛索,對中國嚟講,係十分之麻煩,正係俾又唔係,唔俾又唔係,俾咗, 金正恩 隨時因為美國俾得更多走數,唔俾呢, 金正恩 一旦走去投誠,唔通中國學當年大清帝國咁出兵北韓咩,當年大清帝國同日本帝國爭奪朝鮮王國嘅宗主權,大清帝國出兵打清日戰爭,都輸到一仆一碌,唔通依家中國又想輸鑊甘,依家 金正恩 係擺明車馬有美國佬嘅支持,你話點玩至得?

所以 金正恩 如果返平壤無乜成果嘅話, 金正恩 應該好快就宣布同特朗普嘅和談地點,而且和談地點,一定唔會喺北京,而係歐洲國家。相反,如果 金正恩 有成果,和談地點可能主動提出喺北京,屆時北韓就成為中國同美國佬講數嘅籌碼,問題係習近平最終肯俾幾多出嚟滿足 金正恩 ,但依家問題係,習近平唔似一個會講deal嘅人,所以如果呢劑單deal炒咗粉,我睇都頗為大鑊吓,呢個就係現實。

發表迴響

你的電子郵件位址並不會被公開。 必要欄位標記為 *