Facebook-1-min

Facebook 又改演算法:加快擦中國鞋

Facebook 應該以為得罪傳媒,同埋擦中國鞋唔夠快,至搞到 Cambridge Analytica 件事一鑊泡,所以竟然膠到將惡名昭彰,優先擺本地傳媒喺News Feed政策喺全球各地實施,呢招好絕,但唔會救到 Facebook 。

Facebook 改演算法只會激嬲更多人

Facebook 嘅諗法好一石二鳥,就係一方面應付果啲New York Times, BBC呢啲一早被 Facebook 激到噴血嘅媒體,佢以為佢地因 Facebook 演算法問題而主動玩殘 Facebook ,所以要氹番佢地,另一方面,加快擦中國鞋,大家諗吓陳澍呢種人主政下嘅 Facebook ,會俾乜嘢 News Feed 入嚟,大家睇到PTT01、大榴槤呢啲仆街可以玩Instant Article 就知道問題喺邊度。我恐怕大家個 News Feed,隨時充滿HKGPao、幫黨出聲呢啲垃圾,屆時香港人唔逃離 Facebook 都唔得。

Facebook 呢次濫用演算法係唔會成功,因為傳媒唔會再信你 Facebook 呢間公司,特別係反中國政府果啲,同埋有西方左翼背景嘅人,一定對你 Facebook 敬而遠之,另一方面,如果呢次改演算法嘅結果,好可能係討好中國當局嘅話,西方國家政府只會加快郁 Facebook 嘅步伐,因為 Facebook 依家班友嘅作為,其實仲危險過當年楊致遠等人主政嘅 Yahoo! 。 Yahoo! 當年都累死過師濤喇,西方國家真係唔知呢鋪,你 Facebook 仲會累死乜人而無人知。

所以 Facebook 嘅真正問題,最終係人嘅問題,好可能係要換走 Mark Zuckerberg 為首嘅急功近利管理層,整體管理層行事Mindset比較接近Steve Jobs年代嘅Apple,或退出中國後嘅Google,咁至可能重新得到信任,同比較正常,依家係點改都好,都唔會有人相信 Facebook ,因為 Facebook 喺演算法上面根本係無透明度,同Google要推廣技術有廣泛文件支援好唔同嘅。

發表迴響

你的電子郵件位址並不會被公開。 必要欄位標記為 *