毛記葵涌-上市-min

毛記葵涌 :財毀會候選股票

100毛嘅控股公司 毛記葵涌 終於上市,上市第一日炒到係威係勢,一度見十一蚊,如果抽中又喺果陣沽,應該發過豬頭。只不過如果你抽中咗 毛記葵涌 ,你呢幾日好沽鬼晒啲股票,過一個快樂嘅復活節喇,因為呢啲股,我講句難聽啲,我叫財毀會候選股票。

毛記葵涌 大戶會點玩?

香港啲細價股,同華爾街狼人啲OTC股票好似,就係價位上落大,而且幕後莊家持有大量股票。而細價股最惡頂係,其實大家喺大利市機係睇唔到實際啲盤嘅變化,而係要睇CCASS嘅變化,你至知真正發生乜事。而CCASS唔單只接受喺Terminal之間嘅Open Market Deal,亦接受俗稱 Bought Note & Sold Note 嘅交易,呢個交易一般係大額交易,咁就有問題喇,因為 Bought Not & Sold Note 呢種轉讓法,你只會喺印花稅署睇到發生乜事,而當中股價係點,你唔會即時知。而好多個人都無CCASS戶口,如果買賣雙方都用同一個CCASS代表行轉讓,你唔會知有大額股票交易發生過,因為CCASS只會睇到唔同證券公司嘅持股分佈,從而去估依家啲貨喺邊度,所以成日有財毀會裡面大家估會財毀嘅細價股,暴升暴跌咪係咁解。呢個亦解釋到,點解 毛記葵涌 嘅集資額咁鬼唔正常嘅細,因為呢個會涉及好多市場上睇唔到嘅交易。

而點解要Bought Note & Sold Note 交易,因為當中可能隱含大額嘅折扣,所以突然有條友沽貨沽到一頸血,有乜奇啫,佢都唔係用市價買嘅,佢車爆個倉關你叉事咩,佢套現之嘛。所以 毛記葵涌 係充滿風險嘅股票,如果你玩慣細價股,見慣風浪,無問題,你當佢係一隻有gimmick嘅殻咁炒得,專家Dickson可以改行做財經公關,隨時分析員都俾佢玩到陀陀令,唔好話記者。但如果你一向係純粹賭IPO白頭片,唔該要走趁早,因為你班艇仔係唔會知道幾時突然捲起龍捲風,所以你俾我,我唔會抽 毛記葵涌 ,而依家喺市面吸貨,你賭得起先咁做,林日曦只不過係數字上嘅億萬富豪而已,佢郁唔郁到啲貨都係問題。

發表迴響

你的電子郵件位址並不會被公開。 必要欄位標記為 *