iQOS-1-min

iQOS 同電子煙:越早管越好

iQoS 喺香港有唔少人食,但好多人都係偷偷食,呢種無咁多二手煙問題嘅香煙,反而要偷偷食,其實都係好荒謬嘅事。其實政府早啲將 iQos 、電子煙納入監管,係監管,即係賣得,但稅照收,對成個控煙政策其實有好處。

iQOS 電子煙都納入監管嘅好處

先講稅收,其實睇 iQOS 煙彈個盒上面嘅德國政府標貼就明,就係稅收基本上政府照收,當然可以收平啲嘅,但至少政府係有稅可收,我相信喺公共財政立場,政府無理由唔將 iQOS 合法化納入監管。

點解我話 iQOS 越早管越好呢,其實呢個亦同力抗燃果雙inhaler有關,依家台灣都有呢隻inhaler賣,仲係喺屈臣氏有得賣果隻嘅情況,如果依家Nicorette一類尼古丁代用品,形狀同香煙咁似,如果唔准賣 iQOS 同電子煙,但准 Nicorette Inhaler 賣,情況就會變得十分之唔合理,恐怕呢類解決手感問題嘅尼古丁代用品嘅產品,會遭到挑戰,或者批評,呢樣嘢又何必呢?

另一方面,解決二手煙呢種公害,亦都係一個理由,包括擴大禁止吸食傳統香煙嘅地區。

煙民係有權利繼續食煙,但無可否認,二手煙係會影響他人健康,污染他人享受清新空氣嘅權利,而 iQoS 或電子煙,或者Nicorette嘅尼古丁代用品嘅好處,都係無二手煙嘅問題,即係傳統一般有人食煙,但依家唔俾食煙果啲地方,例如酒吧食肆,其實俾 iQOS 、電子煙或使用Nicorette inhaler,相信好多人舉腳贊成,但另一方面,傳統香煙唔單只禁車站果啲咁簡單,係擴大到禁繁忙行人路,或者個別地區,只可以喺個別公共吸煙房間使用,好似日本嘅做法,咁就大大取締二手煙問題之餘,亦減少咗好多阻力,因為煙民係有無咁擾民,甚至唔擾民嘅代用品,只不過你班友唔用啫,咁又另一個講法。所以呢個亦係點解, iQOS 或者電子煙,可以收少一啲稅,提供誘因。當然 iQOs 喺收稅難度上最易,因為佢真係煙草產品,現有法例就可以俾佢入口,電子煙果啲精油仲話唔敢點管。由易嘅開始,唔係政府咁都唔識嘛。

2 thoughts on “iQOS 同電子煙:越早管越好

  1. 各下見其一不見其二, 我人在香港, 眼見已經有幾種IQOS既代用電煙管在賣, IQOS興得咁快既原因: 1. 聲稱無NICOTINE; 2. 化合中加入堅果或花草之類香味, 減少香煙本來討人厭既味道; 3. 演嘢物品

    另外講得IQOS一定要講埋VAPE

    基本上呢兩種產品根本就係重演緊清未福壽膏事件

  2. 電子煙都唔完全係冇二手煙問題,畢竟吸煙者吸入後再噴氣都係有陣味。雖然果種煙係冇一般吸煙咁濃同嗆鼻,但都唔至於冇滋擾。

    所以話開放禁煙地方吸二手煙,我唔贊成。但純尼古丁吸入器對煙民健康都好過吸煙,值得政府接納。

發表迴響

你的電子郵件位址並不會被公開。 必要欄位標記為 *