黃子華-黃牛黨-min

黃子華 黃牛黨 與退聯IT

梁家傑一直被人感覺係好離地,只不過離地到好似佢咁,都要呻 黃子華 最後一場棟篤笑嘅黃牛黨問題,就證明依家黃牛黨嘅問題去到一個公害嘅程度,甚至係損害緊成個娛樂圈,而呢堆問題,又同香港娛樂界一啲陋習,同退聯IT有關。

黃子華 反映嘅黃牛黨同退聯IT問題

我唔會話德國無黃牛黨,但德國人一般如果買咗飛因事嚟唔到,要賣番出去,一般係可以用番同一個賣飛網賣番,而價錢係稍有折讓,呢個做法其實最公允,對雙方都方便同公道(因為唔駛寄番張飛,ticketing office註銷將舊飛,發新飛俾買家就係)。同埋,德國唔會容許贊助商hold起大量所謂內部預售飛,無論足球賽事定Cat一類節目都唔會容許咁做,如果要咁搞唔該包場,唔好玩啲公眾。香港娛樂界有啲友仔,根本自己做埋黃牛黨果份,內部預售俾啲娛樂界嘅老友牟利,有啲人會得益,但結果就係冷卻咗香港人睇演唱會或睇騷嘅興緻,要睇不如儲夠一筆錢去外國睇個飽,至少人地係做法公道公平,呢個絕對係娛樂界自己玩殘自己嘅作為嚟,唔改正香港娛樂圈好難有運行,恕我直言。

另一方面,AEG嘅系統好明顯係退聯到同城市電腦售票網同一級別,特別係明顯無機制防止啲中國人用Robot或類似手法屈機,喺澳洲、歐洲,有啲仆街寫bot出嚟同你們爭飛,有一段時間,有啲演唱會或球賽,被 黃牛黨 啲bot買晒,幾乎被人媽爆,因此,除咗用Captcha去杜絕啲bot(但有啲仆街bot可以繞過Captcha,Captcha並非萬能),亦開始喺Firewall層面去打bot,避免啲飛俾bot買晒,我想問AEG有無機制去杜絕啲bot,同埋管理啲traffic,特別明知咁多人會爭黃子華啲飛,好明顯,典型香港IT問題,系統退聯,設計無諗過解決問題,香港娛樂界好日都無好嘢睇,嚟一劑黃子華收山,啲系統問題一次爆晒出嚟,勁過stress test。香港啲退聯IT,黃牛黨要玩殘你容乜易,特別中國有的是人同仆街,呢鋪香港咁多問題真係 黃子華 唔收山都唔得。

發表迴響

你的電子郵件位址並不會被公開。 必要欄位標記為 *