曾俊華

曾俊華 學咗英國政客嘅玩法

喺林鄭月娥做咗成年嘅時間,大家以為 曾俊華 消失咗,正當陳茂波派錢派到雞手鴨腳,不知所謂,全民怨聲載道果陣, 曾俊華 突然出現,為英國出品嘅電影《超級無敵世界波》(Early Man)做配音,雖然係一早就請咗,但好明顯,反映曾林之戰仲未結束,相反,林鄭月娥唔知幾時自己會消失咗都唔知。

曾俊華 嘅英國政客玩法

呢種跨界做電影配音,或電台電視節目嘅玩法,係英國政客典型保持政治能量嘅玩法,大家都記得現任我國外相,依家搞BREXIT搞到一鑊泡嘅Boris Johnson,都係透過BBC Have I got the news for you裡面嘅表現去保持佢嘅政治能量(當然仲包括大量佢啲kai都無朋友嘅行為,所以有人譏諷佢係小丑咪咁解)。當然亦因為佢前財政司司長嘅身份,所以政府無人夠膽駛橫手阻止佢,你試吓由游蕙禎去做有乜結果,正常嚟講,游蕙禎應該可以被電視台請做電視節目或配音,或者羅冠聰,如果佢唔係踢波嘅走去鬧爆講波果個,佢一早返去講電競都保持到政治能量喇,你估好似香港泛民其他政客,除咗做議員助理,就乜叉保持政治能量嘅方法都唔識。(其實方國珊都係呢類蠢人,以佢做過電視嘅資歷同人脈,佢出番嚟做電視,一早做咗立法會議員喇,證明香港搞政治啲友仔,全部都仲喺周末革命黨嘅水平)。

依家對林鄭月娥嚟講,出現 曾俊華 呢個玩到英式手法保持政治能量嘅隱形對手係好大件事,以依家搞到神唔似神,鬼唔似鬼嘅表現,大家諗吓,如果 曾俊華 突然組類似影子政府嘅嘢,你估林鄭月娥可唔可以跳海,呢個亦係林鄭月娥要透過李永達、羅致光、李華明呢啲友仔,去拉攏民主黨嘅背景,如果民主黨都無法企喺中立果面,林鄭月娥死得仲慘,唔通靠班譚耀宗呢啲蠢材去護航呀,死咗都唔知乜事喇,呢個正係政治現實。

依家睇嚟習近平好似好威咁,但八國聯軍指向北京大勢已成嘅時候,可以乜事都可以發生,如果有朝一日 曾俊華 唔係特首,但做香港布政司,或類似位置,呢啲嘢點話得埋,林鄭月娥多少都要俾面陳方安生,你估又係無原因。係葉劉淑儀,到依家仍然好白痴唔知乜事,投共太耐變蠢係正常。

發表迴響

你的電子郵件位址並不會被公開。 必要欄位標記為 *