Benz-單車-min

Benz 撞死單車男事件:揸德國車唔該有德國司機嘅公德心

大埔發生一單, Benz 高速喺行人過路位撞死單車男嘅事件,果位 Benz 司機,係一定要被拉,如果有人衝燈,危險駕駛導致他人死亡一定走唔甩,會唔會告到老謀,就睇有無更多證件。但有另一個爭論點係,單車司機係唔係應該行人過路位落車推車。以我喺德國嘅經驗:答案係 No 。果位 Benz 司機,應該負上幾乎係全責。

Benz 司機完全無司機應該修養

我睇番蘋果嘅片,好清楚,當時死者係由單車路經行人過路線再轉另一段單車路,當時佢係綠燈嘅話,佢基本上隨即好快進入另一段單車路,所以,佢無理由落車推車,如果佢原本喺行人路等,如果前面佢繼續路程都係單車路,都係上車前進,而唔會無喇喇落車,你試吓喺德國市區揸一轉,除非燈位比較長,反而會落車。而片中架 Benz ,完全無減速嘅意圖,呢啲仆街唔係危險駕駛導致他人死亡又係乜嘢?呢件事,如果喺德國呢啲單車廣泛通行國家發生,我估果位司機都可以準備賠到甩褲,兼坐監坐到甩褲,當然,呢類司機,大部分情況下,係連牌都考唔到,因為德國揸車,入到市區或村鎮,一定係行人大晒,有可能過路嘅位,小心啲收油好過,揸單車都係咁,唔好講一般揸車喇。

香港有堆人喜愛德國車嘅優秀性能,無錯,德國嘅Autobahn係飛得好X爽,但佢地有無諗過,德國車高性能嘅前提,係德國嚴到爆廠嘅交通規例,基本上,德國考車牌,唔會容忍呢類司機出現,平日路上都唔會,喺德國,乜嘢人嘅車會轉彎唔收油,行人過路處唔收油,以為自己去咗秋名山,並唔係掛住NL, B, PL, F或瑞士國徽呢啲牌嘅外來司機,外來司機一般okay,係掛住D牌車,但個牌唔知邊度淘返嚟嘅華人。華人嘅駕駛態度,我可以講係尤其惡劣,簡直係道路炸彈。呢一點,無論香港、定中國嚟都一樣,越有錢越仆街,平日呢班友轉彎指揮燈都唔打,以為可以搏懵衝燈闖下大禍有乜奇?

所以俾我,我唔會返香港揸單車,香港啲修路仆街之外,香港啲司機修養更仆街,要有德國車嘅馬力,無德國司機嘅修養,講真,香港揸單車堅係十分之牙煙,因為香港啲司機啲修養真係,我完全不敢恭維。

發表迴響

你的電子郵件位址並不會被公開。 必要欄位標記為 *