Facebook-1-min

星期日休息額外篇: Facebook 危機大家要反省啲乜

我好少寫兩篇星期日休息,要寫都最好留番復活節期間放假(仲要期間我會執Server,咁我係無咁多時間寫文),只不過,近日 Facebook 危機嘅發展,其實大家都係時候反省一吓,呢次 Facebook 危機係點發展出嚟,同埋大家應該如何面對好似 Facebook 呢啲怪獸公司。

Facebook , Content Farm到Cambridge Analytica

Cambridge Analytica可以用一個好白痴嘅心理測驗,呃晒你所有個人資料,其實呢個問題,亦反映一直以嚟 Facebook 用戶嘅一啲問題行為模式,例如share Content Farm嘅嘢,我發現我friend list裡面,有唔少有頭有面嘅人,都可以share content farm嘅白痴內容,或者一啲白痴心理測驗嘅結果,點解會咁嘅呢,因為大家以為一個share掣,一個like掣,或者click去睇Content Farm啲垃圾係no harm,呢種睇嘢以為乜都係no harm嘅思維,簡直係累街坊到爆。你估乜嘢都係no harm㗎,當然,我知道呢啲技倆其實有一段日子,我係估唔到Graph API可以去到呢個白痴地步。如果大家唔反省亂玩心理測驗,亂share嘢嘅危險性,你remove Facebook 咁又點,又會有另一間公司用一樣嘅黐線手段呃晒你啲資料。好似近日有人話打BFF就可以確定自己嘅資料無問題,呢類share都有人信,我覺得都有唔少人無藥可救,所以 Cambridge Analytica呢類公司,只會生生不息咁繼續存在,大家嘅個人資料只會繼續被人呃咗唔知去邊度。

當然, Content Farm可以大行其道,以至Cambridge Analytica可以咁落手,又同 Facebook 主事人嘅行為有關,好似Content Farm以至果啲clickbait post,根本係 Facebook 過往嘅演算法自己產生嘅產物,可以扶持唔少嘅傳媒,但同樣扶持咗唔少垃圾, Facebook 管理層只係識亂改演算法,咁有無好好管理個社區,特別針對果啲假用戶同五毛黨,好明顯 Facebook 係迴避呢方面嘅問題,大家見唔少 Content Farm都可以成為Facebook Instant Article嘅會員,你就知 Facebook 呢間公司講一套做一套,所以呢個亦係大家會對 Facebook 不信任,甚至好似 Elon Musk 咁,立即remove Facebook Page唔留情,佢同 Facebook 做過唔少生意,都應好知呢間公司嘅文化,領教過唔少衰嘢,否則點會刪戶口刪到咁鬼爽,當然我都想學 Elon Musk 咁,只不過我們呢啲Media site,要等多啲人肯移民去Twitter, Telegram或Google+先,始終我們無 Elon Musk 呢個身家同財力,我仲要靠廣告同瀏覽量食飯,如果呢度訂戶係夠,我諗我都會學 Elon Musk,刪咗Facebook Page免得遺禍人間。

Facebook 嘅作風,最終問題出喺 Mark Zuckerberg 身上,呢條友唔同過往大家認識嘅IT新富豪,Google大家知係一班學者,Apple大家睇係Steve Jobs,佢係一個完美主義者,佢其實唔太似美國典型嘅商人。但 Mark Zuckerberg 大家睇到,佢係一個急功近利,不負責任嘅人,可以搞出咁大鑊潛水潛足五日,全世界錯誤當呢個急於發達嘅友仔,係另一個Google或Apple果挺公司,某程度上,佢仲衰過當年Microsoft嘅Bill Gates,只不過Bill Gates未至於掌控全世界嘅資料,而作業系統後嚟亦發展到無想像中咁重要,所以大家就無事發生。所以我對用Snap好有保留,都係我睇到佢地間公司學嘅唔係唔係Steve Jobs,係Zuckerberg呢類仆街,咁我覺得好飽,亦都好夠。

所以未來嘅重大技術,如果由一個仆街所掌握,可以係人類災難。短期最好有人迫 Zuckerberg嘔出 Facebook 管理權同控股權出嚟,俾個正常啲人好啲,長遠嚟講,我估Angel fund唔應該只係睇錢做人, Facebook 真係俾太大嘅教訓。

發表迴響

你的電子郵件位址並不會被公開。 必要欄位標記為 *