渣打銀行

渣打銀行 與廢柴私隱條例

蘋果日報踢爆, 渣打銀行 借貸部班友可以任摷客戶資料嚟sell客,完全無皇管。其實呢種銀行亂攞客戶私隱嘅行為,唔只喺 渣打銀行 ,電訊公司等都係重災區,否則果啲所以仆街收數公司邊度嚟果啲個人資料至得。而私隱專員公署同私隱條例都係廢嘅,咪係關鍵。

渣打銀行 只不過係其中一間

渣打銀行 呢次離晒大譜唔駛講,依家睇私隱專員公署肯唔肯跟進,只不過我對私隱專員公署嘅辦事能力十分之懷疑,就以果啲一大堆懷疑有黑社會背景嘅收數公司為例,就算唔駛要求收數公司必須攞牌,或從業員必須喺警務處申請牌照,至少都必須要求收數公司設立資料保護主任,以及提供資料保護主任嘅聯絡方法,唔肯嘅話就拉人封艇,我相信只要咁玩,一大堆收數公司自動摺埋,呢啲所謂收數公司只不過係游走於法律灰色地帶,意圖用恐嚇手段做嘢嘅一班冚家鏟。但咁多年以嚟,對於收數公司嘅私隱管理都無人提過,你覺得好似 渣打銀行 呢啲機構果啲主管會驚你?嘥氣喇,佢地只會睇住自己年尾嘅B仔做人,生仔有無屎忽都唔關佢地事(如果佢地居然有仔生嘅話)。

所以呢個問題,根本係一個系統性問題,真正嘅官商勾結,唔係李氏力場,而係政府對商界採用法律邊緣手法做生意坐視不理,南生圍又係咁,依家 渣打銀行 都係咁嘅話,香港政府學乜人講法治,啲商界講佔中果陣,講到法治幾X大,呢班友有真正尊重過法治咩,嘥氣喇。所以香港人對商界嘅不滿,就係做正當生意用埋啲黑社會做法,摷機都小事,果啲賣資料俾黑社會至係大事,但一直就係無人理。

唔想香港瀰漫仇商情緒,唯一方法就係正當生意用正當方法去做,而呢次 渣打銀行 係應該出嚟道歉以及同受影響客戶作出金錢賠償,同埋炒咗相關嘅管理層以警傚尤。當然,香港商界一向都係黃子華搵食啫,大晒呀哲學嘅支持者,佢地一定唔會認為自己有問題,有朝一日香港出現一個對商界極度不友善嘅政權你班友唔好怨,但唔少用正當方法做生意嘅中小商人,呢劑真係俾你地累及無辜,十分之唔好彩。當然,依家大家都睇私隱專員點表演嘅,不過我不寄厚望,否則我喺香港都煮得熟Facebook班仆街喇。

發表迴響

你的電子郵件位址並不會被公開。 必要欄位標記為 *