Tatort-min

Tatort :一個香港長大英國人感到疑惑嘅德國電視現象

喺德國開電視,當然一方面係迫自己習慣聽德文,但有一個現象,一定令好多人唔習慣,就係德國ARD或成員地方台,都會經常重播 Tatort , Tatort 係專講凶案嘅「劇集」,好啦,你以為 Tatort 已經好多,唔好意思,隔離國家啲謀殺案,ARD都有興趣,所以有 Der Zurich Krimi, Der Kroatien Krimi, Mordkommission Istanbul 等等。如果香港在德人口夠多,有 Der Hong Kong Krimi 我都唔會意外。

Tatort 與德國人熱愛謀殺片

Tatort 呢個由1970年起開始製作嘅電視劇集系列,已經係德語系文化一部分,甚至德文課本會教呢套劇搞乜東東。德國人係好鍾意警匪片,但偏好謀殺案,甚至有雜誌專講老謀,甚至有成個電視台都係播CSI, Law and Order之類片集,同香港人鍾意警匪片果種動作場面,或一啲極複雜嘅商業罪案唔同。德國呢啲謀殺片嘅動作唔勁,而獨沽一味謀殺,唔會搞到香港出現無間道呢啲去到思考忠誠同自我身份問題嘅電影。所以上個禮拜ARD Gladbeck 講 1988年嘅 Gladbeck 挾持事件,我已經覺得好正就係咁解。(Gladbeck 我覺得香港電台係應該買返嚟播,佢同 NHK 64可以作一個對照嚟睇,反映警察官僚主義問題可以幾害人)。

對一個香港長大嘅英國人,我係好難理解,我承認犯罪片係好好睇,但英國人拍Sherlock變咗一件好型嘅事,又不失邏輯條理,香港嘅警匪片係多樣化,但德國嘅警匪片變成差唔多獨沽一味係老謀嘅世界,甚至有人攞 Tatort 嘅DVD送禮(無錯,送禮),呢樣嘢我就好難理解。

但由1988年Gladbeck挾持事件,成班古龍市(Köln)嘅花生友夠薑明知悍匪揸住枝炮都包實架車圍觀,Kölner Express嘅記者仲會上架賊車教班悍匪上高速公路,我只能講,德國人對犯罪相關事情嘅熱衷係十分之令英國人或香港人感到疑惑。(所以我話拍 Der Hong Kong Krimi 或者有得做,香港好多單大嘢改成德國式Tatort戲劇或者有衝擊㗎)

(法國佬拍警匪片係另一回事,法國佬有本事買Law and Order 返嚟拍,但Paris, enquêtes criminelles最後你睇唔到任何Law and Order痕跡,充滿一陣法蘭西風味,男主角充滿神經質嘅表現,我只能講,呢個國家我又係好難去理解)

發表迴響

你的電子郵件位址並不會被公開。 必要欄位標記為 *