國歌法-min

國歌法 根本係另一種廿三條

國歌法 草案通過,惡搞中國國歌竟然要坐三年監,對我呢個南洋人係極為反感。我本身都鍾意聽黃明志嘅歌,我喺黃明志未紅之前,我已經咁寫(我聽《麻坡的華語》開始),如果香港開咗 國歌法 先例,唔單只係香港有問題,南洋都引為先例,唔仆街就奇。

惡搞 國歌法 有乜問題

大家先重溫黃明志嘅名作《我愛我的國家》,呢首歌係擺明改編馬來西亞國歌,呢首歌爭啲搞到黃明志返到馬來西亞被人拉,雖然首歌對馬來族嘅批評係十分之踩界,我個人係唔同意

我想黃明志改編馬來西亞國歌,痛評時政,佢愛唔愛馬來西亞,佢十分之愛馬來西亞,喺台灣留學期間宿舍掛馬來西亞國旗,佢可以留喺台灣,但佢寧願返馬來西亞發展。馬來西亞政治打壓係好嚴重,馬來西亞政府都唔敢判黃明志入監,香港呢啲垃圾 國歌法 當《中英聯合聲明》去咗邊,香港言論比馬來西亞更不如嘅話,香港呢個一國兩制真係廢話中嘅廢話。所以作為南洋人嘅後代,我完全反對 國歌法 ,甚至任何形式所謂保護國歌免於惡搞,因為惡搞國歌係言論自由嘅一部分,而且呢個隨時可以係一個愛國嘅表現,至少黃明志當年改編馬來西亞國歌係反映佢對馬來西亞呢個國家嘅熱愛,如果佢唔係對馬來西亞嘅熱愛,佢駛鬼搏命改編國歌陳痛時弊,包括種族歧視、獨中生問題,以及貪污問題。

我係家係攞呢首歌嚟做例子問政府,如果有人做黃明志一樣嘅事,係唔係會被拉,香港政府要答係定唔係,唔好話乜嘢假設性問題唔答,唔答嘅話,我就假設香港政府違反國際人權公約,違反中英聯合聲明,扼殺香港人言論自由,衰過《基本法》廿三條,就係咁簡單。

如果真係最唔尊重國歌應該處罰,係中國共產黨,請問邊個迫死田漢,當年迫死田漢嘅相關紅衛兵被人拉咗未,槍咗斃未?事實係,邊個紅衛兵有份迫害田漢,一份清單都無呀,學人立 國歌法 以言入罪,中國共產黨返去收檔吧。英國係無 國歌法 ,英國人有受歐洲人權公約保證嘅自由去改編天祐我王,但搞到有人惡搞你首歌,一定係你個政權有嚴重問題。依家嘅中共果然同納吉呢啲仆街蛇鼠一窩。

發表迴響

你的電子郵件位址並不會被公開。 必要欄位標記為 *