Tempo 紙巾-min

喺德國 Tempo 紙巾唔好亂拋入廁所

喺香港,如果不幸將紙巾留咗喺啲衫度入機洗,通常係一場災難,因為啲紙巾爛晒,然後變咗一舊唔知乜,跟住好難清理。但喺德國, Tempo 紙巾係以洗唔爛嚟招徠,當然廣告係唔可以盡信,但我都無興趣試,直至有一日我唔記得將褲袋裡面嘅 Tempo 攞出嚟。

德國 Tempo 紙巾係唔可以拋入廁所

Tempo 紙巾-min
Tempo 紙巾-min

以上,就係洗完嘅 Tempo 紙巾,完好無缺咁滯,同電視廣告所講大致一樣,真係喪到無朋友。所以,有一樣香港壞習慣,係絕對唔可以喺歐洲國家做,就係無睇清楚紙巾上嘅標籤可唔可以掟入廁所,就將啲紙巾掟入馬桶,你嘅行為,有可能會搞到你所住嘅大廈廁所塞咗,屆時真係好多人多得你呢啲無公德行為唔少,屆時被人鬧爆,甚至要作出賠償,咁就無謂喇。一方面,歐洲啲 Tempo 或其他類似嘅紙巾,都堅係唔會喺水裡面爛,但另一方面,由於唔少歐洲國家嘅水質偏硬,渠道如果無經常做 Anti-Kalk ,本來渠道已經積咗唔少鈣化物,屆時仲唔塞到傻。香港因為啲水奇軟,一般人係無 Anti-Kalk 嘅意識,但歐洲,就明顯另一回事,水喉開出啲水嘅礦物含量,同礦泉水其實差唔多。所以歐洲人好多會買Sodastream幫水喉水加氣飲,而唔係買樽裝水嚟飲,又要退樽,又貴,其實係好傻仔嘅一回事。

唔只喺香港,其實喺台灣,都要睇清楚啲紙可唔可以掟入廁所,好似台北、高雄呢啲大城市渠道無乜問題,但鄉村地區,你嘅做法可以多得你唔少,依家台灣賣啲廁紙、紙巾都有標明掟唔掟得入廁所,請大家去台灣果陣有公德睇清楚。

當然某程度上,香港人都可以懷疑今日喺香港賣嘅 Tempo 紙巾,仲係唔係歐洲製造,雖然話紙嚟自歐洲,但係唔係同一樣嘅紙呢?我唔知依家香港啲 Tempo 擺咗入洗衣機有乜結果,如果讀者可以話俾我聽就好,但依家香港嘅 Tempo 紙巾都無標明產地來源,加上依家 SCA Hong Kong 係直接由維達控制嘅公司(雖然香港維達嘅大股東都係SCA),所以民眾對此有所懷疑,其實都十分之正常嘅事。

2 thoughts on “喺德國 Tempo 紙巾唔好亂拋入廁所

發表迴響

你的電子郵件位址並不會被公開。 必要欄位標記為 *