Kitchen_Impossible-min

Kitchen Impossible : 邊個話hacker只會喺電腦前出現

講補選已經講到悶,由今日開始,我會講啲德國crossover香港嘅嘢,我唔會認為成棚人一定要移居德國,我並唔係啲別有用心同焦土派有關嘅五毛。但有啲嘢,可以帶返嚟香港有所改進,例如電視製作。 Kitchen Impossible ,正係一樣我想幾耐嘅節目。

Kitchen Impossible 與廚房嘅 hacker

Kitchen Impossible 係 RTL Group 旗下商業電視台 VOX 星期日嘅節目,呢個烹飪節目,你基本上學唔到烹飪技巧,因為呢個節目係挑戰啲大師嘅嘢。主持人同另一個嘉賓主持,要按指令去唔同國家嘅有名食府,食一道神秘菜式,然後要喺兩日後喺同一個食府嘅廚房煮番出嚟,俾果個食府嘅熟客或者職員評分,究竟同原裝有幾似。至於啲材料、做法等等,就由主持人自己諗爆佢。

呢個節目我覺得堅好玩,雖然我德文唔叻,因為呢種玩法,其實接近hacker嘅reverse engineering,hacker要reverse engineering一樣嘢,都可以有好多唔同方法估番件嘢嘅logic或點做,但你依家講緊係Analog過唔Analog嘅烹飪,仲要揀得嘅都係啲大廚嚟,有時睇主持人諗爆頭,或者做到一鑊泡都係一件好過癮嘅事嚟,呢個烹飪節目,可以講係好益智嘅烹飪節目,因為佢學唔係烹飪,而係一種逆向工程嘅工作,即係叫你入一間米芝蓮食府,做番果道菜式,果個味道,高手都未必個個做到,否則駛鬼食譜咩,你話係唔係?

呢個係商業電視台嚟講,我見到少有比公共廣播更益智而且有娛樂性嘅節目,當然星期日睇呢個節目好合理,因為德國ARD 一台一般星期日晚係播Tatort(凶案現場,一個有悠久歷史嘅老謀劇集,德國人好鍾意睇謀殺片,呢個有機會另行討論,因為德國人都唔明點解咁鍾意睇罪案有關嘅嘢),你唔想禮拜日見到鹹魚或差人,咁 Kitchen Impossible 確係一個幾好嘅選擇嚟。其實香港啲電視台,可唔可以諗多少少呢啲橋,為啟迪民智做多少少嘢。

發表迴響

你的電子郵件位址並不會被公開。 必要欄位標記為 *