倒屎的學問

毓民擲蕉,絕對係九西投票俾佢嘅人期望佢做,因為大家投佢入去,就係衝擊個膠到無朋友嘅建制,連議員私人法案要通過都難過登天嘅議會,仲要有硬膠到爆嘅分組點票制。設計呢啲制度嘅膠人,佢地係自作自受。

不過,擲蕉未必係最好倒屎戰略,我之前講過,長毛係有膠力不足嘅問題,毓民都一樣。毓民擲蕉好彩唔準,如果擲中特首,當勞都未必會告佢,但老鼠成呢類福佳,一定會搵位入佢,搵差佬告毓民battery或者general assault都夠煩。我地唔期望,社民連嘅議員去做楊佳。

下鋪唔一定擲蕉,當然我膠力都唔強,可能拉banner之類嘅表演都好okay,甚至其他膠招,我覺得大家創意可能比我好。玩膠要點係好笑,搞到目標人物變咗笑料,恥笑一生,好似今晚準備上電視台受靶嘅陳克勤咁,每次食KFC雞胸肉都諗起佢,咁就成功。

玩膠玩激進絕對係一門藝術,喺議會質詢表現,長毛同毓民係交足貨,但論玩膠,亦係大家最期望嘅,佢地係要更多嘅研究同創意。

後話:我只可以講,毓民呢次玩得未夠靚,但社民連喺議會玩嘢,同民進黨朱高正當年做台灣Rambo一樣,有戰略合理性,請大家再重溫現職中央政策組全職顧問嘅劉細良,2005年嘅文章《群眾運動的邏輯--韓農的肢體劇場》。毓民擺明做show,點呀,吹呀,依家網上大家討論緊份施政報告,定毓民為生果金憤而擲蕉?

13 thoughts on “倒屎的學問

  1. 施政報告沒有真正內容,憑什麼說討論施政報告才是實事正經事?

    這令人想起「做柒事」。

  2. 我都叫我朋友,費時浪費筆墨寫這份充斥技術細節,但無大方向的施政報告。

  3. 你是不是求創意?
    我有! 相信至此之後立法會都唔準人地帶蕉上黎…我建議各議員及旁聽者帶白紙入內, 然後摺紙飛機, 一隻一隻咁從天而降….

    又或者…飛機都費事摺. 帶冥通銀行果D 白銀從天而降…拋出一大乍, 更具視覺效果.

  4. 呢個show已經俾唔少人post上youtube.
    雖然有大部分人大讚社民連三子”好波”, 但亦有人覺得佢地只係大吵大鬧, 解決唔到問題喎?
    大家點睇? (我實答”Well done!”)

  5. 老實講, 立法會如此選法如此投票方式會為大家做到野咩 ? 社民連其中一功能係為市民大眾出氣(我個人認為好重要), 起碼聽立法會開會得個講字之餘仲有 D 娛樂.

    陳克勤似乎易冇乜受靶, 可能大班被某力量和諧化左卦.

  6. To Madeline:係有啲中國人接受唔到呢種騷,佢地思維太舊。

    To 匿名:今日《也文也武一大班》根本喺度盡情恥笑陳克勤,睇高登人睇得幾開心就知,係槍斃佢都費時。

  7. 關於老鼠成。
    其實想去太空城,駛嘜坐船去香港,週圍都有。
    社民連可以嘗試將老鼠成同太空城掛勾。等家國勃起時,射左就一定諗返起老鼠成。

  8. 其實我倒覺得那條香蕉太「新鮮」。

    佢地應該去幫襯《一百萬人的故事》裡面賣爛生果那位老人家。
    擲爛蕉,重可以聲稱話因為生果金太少,只夠長者買爛蕉添﹗

發表迴響

你的電子郵件位址並不會被公開。 必要欄位標記為 *