海航-華南藍天

海航 似爆咗煲

海航 爆煲危機越演越烈,依家網上流傳一封華南藍天航空油料有限公司嘅追數信,如果 海航 喺3月16日下午四點前(北京時間為準)未找晒啲數,3月18日就唔駛喺華南地區嘅機場加油,屆時中國航空會否出現大亂,我真係留名食花生。

海航 應該爆咗煲

呢類對 海航 不利嘅材料,係唔應該依家喺微博周圍走,因為依家人大兩會期間,啱啱習近平準備登基做皇帝,王岐山隨時做國家副主席,佢喺「政治局」排名第八,所以至出咗王八呢個極難聽嘅花名(你知王八蛋點解,你就知王岐山點解叫王八),依家人大政協兩會期間玩啲咁嘅追數信,唔係向 海航 班友施壓,甚至向中央施壓就有鬼,但都無計,因為華南藍天中國航油只佔51%股權,另外四成九係英國石油,同埋香港富地石油嘅,外資股東要迫 海航 倉好正常,都係果句,如果中央政府唔找數俾中國航油,咁中國航海喺海外以至同啲合資公司嘅關係都好難做人。所以我相信呢封嘢都幾堅,換言之,中央政府一定要出手救 海航 ,否則一係成個海南島破產,一係因此引發支爆危機,都咪玩唔好玩,都係果句, 海航 喺海外都一堆資產,咁樣被人追數係會觸發連鎖反應。

所以 海航 喺3月16日前可唔可以再融資,甚至得到中國中央政府直接泵水,就變得好關鍵,畢竟 海航 喺海外好貴咁買返嚟嘅資產,唔會一時三刻可以隨時賣到出去,賤價賣一樣係會搞出大頭佛出嚟,所以依家唯一可以救 海航 就係習近平大帝指令中央邊個部門或機構泵水,只不過呢個亦代表中國政府將 海航 嘅風險孭上身,又加上支爆風險。

仲有一樣嘢,依家全世界密切留意緊,香港地產市場會唔會引發銀行危機,再加上依家港匯指數奇弱,代表大量資金經香港走到美國,咁乜嘢人嘅錢要咁急去美國,仲要人大政協兩會期間做呢啲嘢呢,大家真係要留意。所以啲人成日話支唔會爆,如果無 海航 呢間嘢,我都覺得未必咁快爆,但依家 海航 個款,連中國自己啲公司都冚唔住件事,你覺得支真係唔會大爆,不如問吓王岐山仲有乜奇謀妙計,可以變啲銀紙出嚟填咗 海航 呢個無底深潭先喇。

發表迴響

你的電子郵件位址並不會被公開。 必要欄位標記為 *