DSE-min

星期日休息:全民 DSE 與考試制度改革

今年財政預算案玩到全民 DSE ,為考評局填氹填到呢個鬧劇,我覺得件事已經好膠。只不過,呢毎咁膠嘅事,其實仲有好多思考空間,全民 DSE 未至於完全係鬧劇,而香港考試制度係唔係應該繼續任由香港考評局呢個垃圾機構壟斷落去,都係值得討論。

考評局透過 DSE 壟斷理應結束

陳仲尼呢條友,除咗用廢人嚟形容佢,我諗唔到第二樣嘢,因為佢居然可以將考評局呢個獨市生意搞到蝕錢,呢條友除咗管理不善,無第二樣嘢可以形容佢,一早應該踢佢出考評局,搵個第二個似啲樣嘅人做考評局主席。而依家香港考評局可以透過 DSE 咁玩獨市生意,呢樣嘢本身亦好唔健康,對考生自己選擇教育前路全無幫助,而且迫好多香港人考好多無謂嘅考試。

喺英國,基本上考試係一場市場大混戰,英格蘭、威爾斯同北愛已經係五強大戰(Oxford, Cambridge and RSA Examinations、Assessment and Qualifications Alliance、Edexcel、WJEC同埋Council for the Curriculum, Examinations & Assessment),仲要Edexcel直頭係商業機構嚟。所以今時今日,英國教育改革改到一鑊粥都好,英國啲考試仍然有國際上認受性,因為英國當公開考試係市場嚟管,而市場有競爭至會有好產品,考生要跟你公開考試嘅準則做人,咁定準則果個唔駛面對市場㗎。

而且英國嘅考試,唔只面對自己國內嘅競爭,UCAS係有張Traiff表(最新睇呢張https://www.ucas.com/file/63541/download?token=uz826-Cb,全球各地都可以攞張Cert入UCAS,當然包括 DSE ,所以喺呢個變態嘅世界,英國啲考試保持到商業競爭,特別面對美國嘅競爭,都係呢個緣故。當然考評局 DSE 喺英國認受性叫唔錯,根據 UCAS 個磅, DSE 係同英國本土 A-Level同級,但如果有競爭,會唔會更好,呢一點,我認為係嘅。我諗如果有競爭,唔會長期要聽綠袖子聽到大家怕(無錯,我都係聽綠袖子嘅)

JUPAS 應該學 UCAS 咁玩

我喺1997年果年嘅JUPAS加UCAS報考人,雖然我係讀中文中學,但我英文成績係玩組合化,因為我本身就要應付UCAS,所以我係 TOEEL Paper based成績(我當年550,另加TWE 5分,即係今日IBT 79-80,相等於IELTS 6.5,我考果陣中六),搭GCE O Level拎C,咁樣砌入中文大學。當年UCAS仲話要認證海外成績(當然香港同美國都豁免),依家UCAS都有大部分成績嘅Traiff對照表。

依家JUPAS反而變咗以 DSE 優先,呢個係唔啱數,如果因為有需要報考海外大學,係唔係 DSE 只要考番啲核心科目就夠呢,甚至 JUPAS 抄 UCAS果個Traiff Table,總之你攞一定嘅海外成績入嚟都可以認受,令海外考試直接同 DSE 競爭, DSE 至可能做得更加要同國際要求一致。

當然,開放市場嘅話,只要搞得掂作弊問題,我唔認為開放 DSE 俾台灣同中國學生喺海外考有問題,屆時唔係全民 DSE ,係全亞洲 DSE ,既然喺亞洲嚟講,DSE 嘅認受性唔錯,俾我就考評局派人喺台灣、中國、馬來西亞等地設立試場,擺明當一盤生意咁做。

但另一個思考問題,都係可以討論,就係香港大學嘅入學人數,我唔認為要再收啲中國學生,點解香港學額要交俾中國學生,係唔係學德國咁,易入難出咁樣仲公道,德國大學學費好平,德國考大學唔會好似香港、英國有咁多變態考試,但德國大學有名難畢業,有啲學系係要讀多一年,甚至兩年至畢到業。當然太難畢業會唔會讀到有人入青山,呢點我唔知喇,只不過,如果香港行德國式易入難出,全民 DSE 係唔係問題,而僱主會唔會對大學畢業生水準有所埋怨,因為德國係唔到果個水準,就唔落得山,無碌學位呢回事。呢點其實值得討論,甚至有啲人借全民 DSE 機會得一個入大學校園機會,可能係好事嚟,但好明顯,因為件事太膠,香港人似乎無法再深一層去思考。

One thought on “星期日休息:全民 DSE 與考試制度改革

  1. > 俾我就考評局派人喺台灣、中國、馬來西亞等地設立試場

    問題係DSE想模仿IB,引入了很多校本評核,並不純粹是考試,所以讓海外報考會有困難。至少考評局要搞得掂外地學校既校本評核先。

發表迴響

你的電子郵件位址並不會被公開。 必要欄位標記為 *