海航-min-2

海航 爭街數爭到會搞出支爆

海航 爭街數越爭越恐怖,依家傳出最新一筆爭嘅街數,係中央企業中國航油,依家 海航 爭三十億人民幣油數未找,依家中央政府可以點樣支持 海航 ,由中央政府點處理中國航油呢筆數就知,而且呢筆數唔係話可以隨便冚就冚到嘅數。

海航 點找中國航油(新加坡)條數

中國航油嘅數有兩部分,一部分係中國國內機場嘅加油數,果啲係中國航空總公司自己負責番,如果北京中央政府有心冚數,係應該可以同啲數搞化妝,所以呢點我未係十分之擔心住。但另一部分,就唔係咁講,果部分係爭中國航油海外嘅數,即係中國航油(新加坡)呢間上市公司揸住嘅數,由於中國航油(新加坡)係上市公司,仲要有百分之二十股權係英國石油(BP)揸住,呢部分數係無乜可能爭,否則就英國石油同中國航油(新加坡)啲外資股東出嚟嘈。特別英國石油後面都係啲美國芬佬,你認為呢班友係食齋㗎,而且 海航 咁爭數,係會影響中國航油(新加坡)喺國際石油市場嘅交易同運作,所以 海航 爭中國航油(新加坡)幾多錢,同埋依家嘅還款狀況,至係關鍵中嘅關鍵,如果中國政府唔肯幫 海航 找晒呢筆數,咁就真係乜嘢麻煩嘢都可以發生。

而一旦 海航 找唔掂中國航油(新加坡)相關嘅數,首當其衝一定係香港航空同HK Express,因為佢地一定要喺香港找油數,唔可能喺中國靠中央政府找油數,除非香港航空同HK Express好大程度上同 海航 割離。但 海航 好多飛機都係借香港航空或HK Express個朵買,香港航空同HK Express係唔係咁容易喺財政上同 海航 割離我好懷疑。而找唔到油數嘅最簡單後果,就係飛機無辦法加油,乜都唔駛飛。所以,喺復活節買咗香港航空同HK Express機票嘅友仔,係應該密切留意 海航 嘅財政狀況,訂酒店果陣尤其小心,否則一旦因 海航 啲飛機要on ground,你啲酒店同機票錢就真係係咁先。

同埋機管局應該披露一下,依家 海航 系嘅航空公司,喺找機管局啲數嘅情況,我相信呢個都係參考嚟,我相信機管局都唔會任得 海航 系嘅公司拖香港人嘅數嘅喎。

發表迴響

你的電子郵件位址並不會被公開。 必要欄位標記為 *