九巴 212-min

由 九巴 罷工睇香港基層

泛民啲人一直都同情心泛濫,成日話幫基層。左膠思想一直都咁睇,但香港啲基層又真唔真係咁抵幫,我睇唔係囉,你睇 九巴 所謂罷駛,得果六架車參加,成棚基層自願被維穩,就知道香港基層無乜必要幫落去,由得佢地快樂咁被搾乾就係。

九巴 基層一啲反抗意識都無

九巴 基層睇唔睇到依家資方嘅方案有問題,睇到,問題係, 九巴 嘅基層同大部分華人基層一樣,位處最基層最受壓迫嘅位置,但偏要為統治階級謀好處,你面對呢啲自虐狂又何必去幫佢地呢?嘥氣。一如你問好多中國基層知唔知共產黨有問題,佢地知,但佢地最終都係開口埋口都係為黨著想,呢種嚟自儒家思想嘅超穩定架構,就係點樣養成港豬嘅原因,因為佢地個腦仲好用過Matrix裡面果啲人肉電池,我指甘願做人肉電池果啲所謂人類。

所以我點睇香港民主嘅出現,香港民主嘅出現,一定好似日本咁,係外人強加上去,日本自由民權運動搞咗幾十年都唔成氣候,日本自由民權運動嘅理由係點實現,但日本戰敗,美軍佔領日本,美國將果套民主強加於日本人身上,日本人行咗幾十年,開始習慣咗至叫做依家有少少根基,但仍然有好多問題,同大韓民國透過汽油彈實現嘅民主,或者台灣透過軟硬兼施手段實現嘅民主係唔同。呢個亦係點解我話香港最好唔好即刻獨立,至少歸英一段日子再決前途亦係咁解,老一輩果種自願維穩,搵食大晒放棄人嘅尊嚴嘅思維,簡直係民主大敵,如果唔靠一套強而有力嘅外力將民主好似日本咁植根,呢班自願維穩人士簡直係阻止香港一切社會改革嘅根源。

所以我一直都好痛恨儒家思想,我一直主張將儒家連根拔起,我一直都睇唔起孔子同孟子呢啲所謂知識分子,一日到黑靠黐當權者嚟搵食嘅知識分子,最後俾咗漢字系國家乜嘢正義觀念,就係無,所以曾幾何時,係連孔子都被奉為法西斯學說嘅先祖之一,我堅係唔覺得奇怪,君君臣臣父父子子呢套理念,不理人間嘅基本公義,結果只係一套奴化嘅維穩機器。如果社會要有進步,某啲所謂中國傳統思想係必須連根拔起至可以作出社會改革,大家睇到 九巴 罷工嘅下場,明喇。

One thought on “由 九巴 罷工睇香港基層

發表迴響

你的電子郵件位址並不會被公開。 必要欄位標記為 *