槍械管制-min

槍械管制 關鍵:彈藥與訓練

每次美國搞出槍擊案,全世界都討論美國 槍械管制 ,當然,左膠一刀切唔俾持槍嘅諗法,或所謂加強槍械管制都係不切實際,我懷疑左膠有幾多人開過槍。 槍械管制 應該點做,其實睇睇瑞士就知。瑞士人人間屋都有槍,有外敵入侵男丁有責任打柒啲仆街,但點解瑞士無事美國有事,唔係乜嘢都係可以用國民質素嚟解釋。

槍械管制 關鍵:彈藥同訓練

首先,揸槍同揸車一樣,應該要考牌,喺瑞士,好多人屋企枝槍根本唔係佢自己,而係政府,因為軍人責任。喺考牌過程,邊啲人係心理變態唔適合揸槍,其實好易篩到出嚟,美國得好少州份有Owner Licence呢樣嘢係黐線。甚至有一定槍法至可以擁有槍械,某程度上係鼓勵多啲好人帶槍。正所謂官府在遠,拳頭在近,對某啲狂徒,可能係即時有人一槍了斷果條友係最有效而安全嘅方案,而唔係唔俾人帶槍,喺美國嘅現實環境,唔俾國民帶槍係唔可能,但確保持槍人士嘅專業水平,我相信連NRA都未必敢反對,因為NRA成立目的本來就係提升美國人嘅槍械使用水平。

另一樣嘢,係彈藥。喺瑞士,屋企有槍唔難,但你買彈藥就好難,仲要啲人買子彈,實際係攞去打靶練槍法,因為男士要考槍法試,否則你當瑞士個兵役制度係流㗎。美國真正問題係,成班友買槍前,唔知佢地嘅專業水平、責任感同心理狀態適唔適合有槍,跟住啲彈藥太容易買,咁出事正常,你試吓依家俾香港人有槍,你睇吓會唔會大亂。有時睇美國啲武器網站,十美金阿水都可以買一堆子彈,呢個至係出事嘅位,當然,大家唔會認真討論。

其實我明NRA果種defensive態度,因為好多支持槍械管制,都係反戰嘅左膠,佢地只係視武器係邪惡,但無諗過平民持械嘅必要性,因為一兩件癲佬而反對平民持械本身,唔明左膠背後嘅邏輯,佢地或者認為,政府無處不在就係最理想嘅世界,但現實梗係唔係咁。左膠嘅無知,其實喺 槍械管制 嘅討論上反映晒出嚟,有人認真攞瑞士嘅 槍械管制 法律做比較,左膠嘅理論果種荒謬,其實係好容易就暴露晒出嚟。只有無知嘅人,至以為政府萬能。

2 thoughts on “槍械管制 關鍵:彈藥與訓練

  1. 「因為好多支持槍械管制,都係反戰嘅左膠……」
    應把「槍械管制」改為「禁槍」。

  2. 呢件事上面根本冇必要抽左膠水,因為所謂「加強槍械管制」既建議,有部分已經係你講緊既野(例如加強背景審查),你不如睇下NRA同班支持者既反應好過。

    無論你膠定唔膠,你既建議佢地都係擋得就擋,然後反指「有校園槍擊﹖畀老師揸埋槍囉」。美國地方咁大,我唔會話擁槍無理,但果班友個腦就係活喺西部片裡面。

    至少加強背景審查、擁槍要考牌、市區唔准拎槍出黎(除非有合理辯解否則露械即犯法),全部都值得做的。但係你諗下依家已經咁多人無牌擁槍,就算畀你立到法,點過渡去考牌制好過。

發表迴響

你的電子郵件位址並不會被公開。 必要欄位標記為 *