粉嶺哥爾夫球場-min

粉嶺哥爾夫球場 收番無可惜

雖然我唔識,亦唔會打哥爾夫球呢啲咁唔環保嘅運動,只不過,我對香港保留哥爾夫球場本來係無意見,因為哥爾夫球場係商業活動必備,只不過,喺依家香港商界唔少人賣港嘅嘴臉下,我認為收番 粉嶺哥爾夫球場 起樓都無乜嘢可惜,香港商界唔捍衛自己嘅落腳點係唔可以怨人。

粉嶺哥爾夫球場 邊個會去打?

依家好多香港商人傾生意,其實都係中國傾,中國有哥爾夫球場,而且喺中共黨官包庇下,可以有幾胡鬧都得,咁何必要爭 粉嶺哥爾夫球場 嘅會籍,依家 粉嶺哥爾夫球場,除咗少數英資公司有公司會籍外,其實好少人可以有會籍,咁既然係咁,又何必死人霸生地,攞晒去起樓算。

特別香港商界有啲黐線人士,咁鍾意講攞船灣淡水湖去填平,填平船灣淡水湖咁高難度,點解唔夷平 粉嶺哥爾夫球場 啫,反正依家中國嘅新發財,都唔會知哥爾夫球係乜嚟,要留低一個英國人嘅哥爾夫球場做乜,鏟平佢,拆咗佢,塞晒啲香港商界最愛嘅中國移民入去,香港人越多,樓價越貴,佢地越發財,屆時全世界乜哥爾夫球會都有得你班友去,何必須留戀一個 粉嶺哥爾夫球場 呢,係唔係。

香港商界好多時都唔獲公眾同情,因為佢地呢班友賺而不知足,如果唔係新界東北果件事搞到咁過份,其實我都未必贊成拆咗 粉嶺哥爾夫球場 ,香港要尊重一啲無權無勢非原居民嘅建立家園權利,但同時都要尊重好似哥爾夫球等傳統上流社會活動,一人讓一步,咁樣其實幾好。但香港有啲地產商,只係識刮到盡,新界東北係邊個地產商賺最多,講嚟講去都係新世界同恆地兩個,呢兩間嘢啲作風係點,大家心照喇。所以既然係咁,咁點解唔鏟起 粉嶺哥爾夫球場 算數,佢地要賺到盡,就成全佢地,就賺晒世界嘅錢,但享受就你班友去第二度自己度掂佢。更何況呢啲地產商,見到囤地就會開心,駛乜去打哥爾夫球至得㗎,係唔係。

所以 粉嶺哥爾夫球場 ,林鄭月娥應該展現佢地強勢領導作風,好以搞DQ案咁收番佢,最好搵個DQ主任做埋收地主任。做政治嘢就用仆街手段,對住有錢佬就郁都唔敢郁,呢啲所謂嘅官,咪正宗跳人肉火圈果啲狗官囉。

發表迴響

你的電子郵件位址並不會被公開。 必要欄位標記為 *