香港電台-min

年初四休息: 香港電台 欠梗咗啲乜

作為一個傳媒出身嘅人,住喺德國係一個有趣嘅經驗,因為時區同地理位置嘅緣故,除咗你可以睇德國電視,亦可以睇英國同奧地利電視(ORF係有唔少正嘢),而英、德、奧都係以公共廣播為主,商業廣播RTL嘅內容,好多時都係美國式嘅垃圾內容嚟。商業電視做得唔cheap其實唔多。而呢個比照之下, 香港電台 作為「遠東版BBC」,有唔少節目都可以搵到佢地照BBC或德國電視行嘅影子,只不過,基於言論環境同人才所限,一比之下你就發覺爭緊啲嘢。呢個,就係我嘅一啲觀察。

香港電台 星期三主場 v. BBC Hardtalk v. DW The Conflict Zone

星期三主場,大家有睇開BBC,都睇到呢個節目明顯係抄BBC Hardtalk個format。Hardtalk呢個節目好蝦人做,因為呢個節目宗旨係Grill個受訪者,有幾多受訪者願意被人攞去Griil至得。BBC Hardtalk嘅開山老祖 Tim Sebastian 後嚟仲俾ARD成員DW挖走,變咗The Conflict Zone出嚟。當然德國佬不單挖走Tim Sebastian,仲要搵個身兼教授、律師、記者一身嘅Michel Friedman作為另一位主持,呢啲我覺得已經係巨艦大炮主義嘅安排。

Hardtalk喺 Tim Sebastian年代好睇喺邊,係Grill人,所以德國佬睇中去挖走佢都係因為德國人本來有鋪記者Grill人嘅癮,一個記者Grill唔夠呀,搵多個專家同你二打一,奧地利靚仔總理Sebastian Kurz去訪問德國果陣,ARD就係咁樣招呼佢嘅,所以星期三主場要好睇,一定要Grill到受訪者啞,唔可以俾佢兩三下太極推手推走咗。

麥嘉緯本來背景上係合適人選,佢畢竟受過法律訓練,讀法侓嘅人去Grill人會比新聞系啲人去Grill唔留情面好多,當係刑事案審犯咁審就係,但係陳志雲果集,我認為暴露咗個問題,就係主持人功力唔夠果陣,遇上陳志雲呢啲太極皇就走人。如果俾我,我實問,如果你認為國家咁好,咁重要,有無考慮過退出英國國籍,我屆時真係想知佢點答。當然,陳志雲係港台之友,麥嘉緯要Grill佢都有所顧忌。

但星期三主場要好睇,Grill同Conflict兩個keyword係好重要,呢類「重口味」節目,觀眾嘅預期係見到受訪者啞口無言,或者被迫「供」出某啲嘢出嚟。一如BBC Hardtalk依家嘅介紹係ask the tough question,大家預期果啲question要係難答。

香港電台 頭條新聞搵區諾軒主持好過喇

跟住我想討論係頭條新聞,用BBC Have I got news for you同頭條新聞比唔太公允,因為BBC果個係純抽水show,基本上係借答問題隨時抽水,呢啲無窮馬力嘅抽水節目,真係英國呢啲有極深厚抽水傳統嘅國家至做得嚟,香港人搞唔掂。但ZDF Heute-show或者ARD Extra-3同頭條新聞嚟比較,就會公允好多,因為佢地都係某程度相似嘅嘢。

頭條新聞一個好大問題係present手法outdate,仍然停留喺歡樂今宵同笑星救地球嘅水平,但笑星救地球有時都好笑過頭條新聞,其實與其搞乜嘢太后與小豪子呢啲核突嘢,或者羅啟新扮女人,有時一啲綴核改相或改廣告仲實際,呢種技倆ZDF Heute-show好常用,例如SPD Martin Schulz被人點玩,請留意以下cap圖

Martin Loser King,寸到堅係一棟都無,當然,ZDF Heute-show同ARD Extra-3果種口臭,多少同Dusseldorf, Koln一帶深厚嘅口臭傳統有關,大家睇Dusseldorf同Koln狂歡節期間巡行點寸啲政治人物就明。

其實有位香港政客,我唔知因為佢平日爛gag太多,爛到屎忽撞棍定係點,佢係出乎意料到有我想要呢種效果,至少佢做香港版Heute-show應該有睇頭

https://www.facebook.com/nokhinau/videos/1574489499308105/?hc_ref=ARRj_Ve-MepTFolCLVvDjOH59bv7x7SAtWQq2u9gJS8Geysdz1LIiXRUOkNJexKim3A&pnref=story

其實平日Heute-show好多呢類型改到黐撚線嘅廣告,但香港無呢樣嘢好耐,羅啟新都唔係改得好笑,競選廣告至見到呢類嘢,我覺得膠咗啲。

或者可以學吓 Extra-3,Der reale Irrsinn (The real madness)環節,列晒全德國啲膠嘢出嚟

https://www.ndr.de/fernsehen/sendungen/extra_3/rueckschau/Der-reale-Irrsinn-im-Ueberblick,realsatire103.html

我估要列一打香港嘅膠嘢出嚟,香港人已經十分之感謝 香港電台 ,係唔係?其實咁做,對政府官員嚟講,都應該十分之有壓力嘅,因為你喺電視被人恥笑,而且應該有大批區議員願意俾料(雖然唔少區議員都係Irrsinn嚟)

香港人仲係大把嘢,需要向外面世界學習,不過唔好學德國謀殺片泛濫呢家嘢。呢點,日後有機會再講。

發表迴響

你的電子郵件位址並不會被公開。 必要欄位標記為 *